کاناډا کې «د افغان ښځو د همغږئ چتر» (Afghan Women Coordination Umbrella)په نوم بنسټ «د افغانانو ترمنځ د اعتماد جوړونې او یووالي» تر سرلیک لاندې غونډه جوړه کړه.
په دې غونډه کې د مدني ټولنې او بشري حقونو یو شمېر فعالانو د نړۍ له بېلابېلو ځایونو په حضوري او انلاین ډول ګډون وکړ.
دغه علمي غونډه د هېواد په داخل او بهر کې د افغانانو ترمنځ د همکارۍ، تفاهم او باور پیاوړتیا لپاره د علمي کړنلارو د څېړنې په موخه جوړه شوې وه.
جمیله افغاني، د افغان ښځو د همغږۍ چتر غړې وویل، چې په دې ناسته کې له افغانستان او د نړۍ له بېلابېلو برخو څخه ۸۰ تنه د مدني ټولنې او بشري حقونو فعالان آنلاین، او ۶۰ تنه فزیکي توګه ګډون کړی و.
امینه احمدي، چې د افغان ښځو د همغږۍ چتر یوه بله غړې ده، د افغانانو ترمنځ بېباوري یوه جدي ستونزه وبلله او ټینګار یې وکړ چې د هېواد دننه او بهر افغانان باید خپلمنځی بحثونه پیل کړي، تر څو ګډ تفاهم ته ورسېږي او د دې ننګونې د حل لارې ومومي.
د یاد پروګرام یوه برخه کې د جمیلې افغان په کوربهتوب «د افغانستان د خلکو، په ځانګړې توګه د مېرمنو، ډلو او بنسټونو ترمنځ د پیوستون نشتون او ستونزو ارزونې» په نوم یو ګردی مېز هم جوړ شو.
په دغه بحث کې شینکۍ کړوخېل، ناجیه زیوري، عرفانالله عرفان، هما علیزۍ، وژمه فروغ، عادله محسني او څانګه صدیقي په حضوري او انلاین ډول ګډون کړی و.
په ولسي جرګه کې د کابل د خلکو پخوانی استازی عرفانالله عرفان، د افغانانو ترمنځ د یووالي او همغږۍ په پیاوړتیا کې د علماوو پر رول ټینګار وکړ. هغه ځینې روحانیون هم تر نیوکې لاندې ونیول، ویې ویل چې دغه کسان ځانونه د خدای ځانګړي استازي ګڼي او دین یې د خپلې کورنۍ میراث ګرځولی دی.
په افغانستان کې د ښځو د حقونو فعالې ناجیه زیوری، د افغانانو ترمنځ د باور جوړونې او همبستګۍ د حللارې په توګه ټینګار وکړ چې افغانان، پرته له دې چې د نړۍ په کوم ځای کې ژوند کوي، باید د افغانستان د ژغورنې لپاره د یوې ګډې اجنډا لاندې یو موټی شي.
د ولسي جرګې پخوانۍ غړې او په کاناډا کې د افغانستان پخوانۍ سفیرې شینکی کروخېل، په دې ناسته کې له افغانانو وغوښتل چې له شخصي او قومي اجنډاګانو څخه ځان وساتي، ځکه چې دا ډول کړنې د خلکو ترمنځ بېباوري زیاته کړې ده، او پر دې یې ټینګار وکړ چې د افغانانو ترمنځ رښتینې او ملي خبرې باید رامنځته شي.
د یاد پروګرام په پای کې ګډونوال پر پنځو کاري ډلو ووېشل شول او د افغانانو ترمنځ د اعتماد جوړونې او یووالي برخه کې یې وړاندیزونه وکړل.
ګډونوالو یاده ناسته د افغانانو ترمنځ د باور جوړونې او همغږۍ پر لور یو اغېزناک ګام وباله او د دې ډول خبرو اترو او نوښتونه د دوام غوښتنه یې وکړه.
د غونډې په پای کې، د دین له علماوو څخه فضلغني کاکړ د غونډې د پایلې په توګه ټینګار وکړ: «موږ باید د تېر وخت له نیمګړتیاوو څخه توبه وکړو، د الله (ج) رضا په پام کې ونیسو، او د افغانمحور یووالي او همغږۍ په روحیه د یوه روښانه راتلونکي لپاره کار وکړو.»
Views: 21