د «بریالۍ څېرې» خپرونه کې مو دا ځل د المان په پلازمینه برلین کې د «die Neue Bühne»رسټورانټ په ګډون د څو رسټورانټونو مسوول ارشاداحمد حمید مېلمه دی.
حمید په ۱۳۶۷ کال کې په کابل ولایت کې په یوه روڼ اندې کورنۍ کې زېږېدلی خو د کورنیو جګړو له امله اړ شو له خپلې کورنۍ سره یوځای له افغانستانه ووځي او اوس له څه باندې ۲۰ کلونو راهیسې په المان کې ژوند کوي.
حمید د شپږو خویندو او وروڼو مشر ورور دی او په ۲۰۱۹ کال کې یې له یوې المانۍ نجلۍ سره واده کړی چې اوس دوې لوڼې لري.
هغه خپل کاروبار په رسټورانټونو کې له ګارسونۍ پیل کړ. په ډېرو هڅو سره وتوانېد چې په ۲۰۱۹ کال کې خپل لومړی رسټورانټ «die Neue Bühne» د المان په برلین ښار کې پرانیزي.
یاد رسټورانټ په یوې جلا طراحۍ او زړه راښکونکې فضا سره تر ډېره د الماني مېلمنو کوربه دی چې په یوه وخت کې د الماني خوړو په وړاندې کولو سره د څه باندې سلو مېلمنو د ځایولو وړتیا لري.
د لومړي رسټورانټ په کاروبار کې په بریالي کېدو سره ارشاد پریکړه وکړه څو خپل کاروبار پراخه کړي چې په همدې سره یې په ۲۰۲۳ کال کې د “Strandidyll Berkenbrück ” په نوم خپل دویم رسټورانټ او په ۲۰۲۴ کال کې یې د “Kaiser Stuben” په نوم درېیم رسټورانټ هم پرانیست.
حمید د یادو رسټورانټونو په جوړولو سره څه باندې ۲۰ افغانانو او غیرافغانانو ته د کار زمینه برابره کړې.
حمید یو له هغو کسانو دی چې په قوي هوډ سره یې خپل خوبونه په واقعیت بدل کړل او د دې ترڅنګیې ټولنې ته هم خدمت کړی دی.
