د درهم سیمې یوې نوې سروې ښودلې چې ډېری اوسېدونکي غواړي د درهم سیمهییز رییس څوکۍ همداسې د خلکو له خوا انتخابي پاتې شي؛ دا په داسې حال کې ده چې د اونټاریو د ایالتي حکومت د هغه قانون پر وړاندې مخالفتونه ډېر شوي چې د فورډ حکومت ته د دې څوکۍ د ټاکلو واک ورکوي.
په دې سروې کې ۱۳۱۱ اوسېدونکو ګډون کړی و. له دې ډلې، له ۹۲ سلنې ډېرو ویلي چې د سیمهییز رییس د انتخابي کېدو ملاتړ کوي، په داسې حال کې چې پاتې ګډونوالو یا له دې نظر سره مخالفت کړی او یا یې ویلي چې د پرېکړې لپاره نورو معلوماتو ته اړتیا لري.
تېره میاشت د فورډ حکومت د ښاروالۍ د ښې حکومتولۍ قانون (Better Municipal Governance Act) په نوم قانون تصویب کړ. دغه قانون په اتو لوړو سیمهییزو ښاروالیو کې د سیمهییزو رییسانو د ټاکلو طریقه بدلوي، چې درهم، پیل، یارک، هالتن، نیاګرا، واټرلو، موسکوکا او سیمکو کاونټي په کې شامل دي.
د دغه قانون له مخې، د ښاروالیو چارو او کور جوړونې وزیر کولی شي سیمهییز رییسان وټاکي او هغوی ته د “قوي رییس” واکونه ورکړي؛ هغه واکونه چې اوس د اونټاریو ځینو ښاروالانو ته ورکړل شوي دي.
د فورډ حکومت وايي، دا قانون به سیمهییز حکومتونه اغېزمن کړي او د کور جوړونې او زیربنایي پروژو په اړه به د پرېکړو بهیر ګړندی کړي.
د اونټاریو د ښاروالیو چارو او کور جوړونې وزیر، راب فلاک (Rob Flack)، د قانون د معرفي کېدو پر مهال ویلي وو: «موږ به تل له خپلو ښاروالیو شریکانو، که په ټیټه کچه وي او که په لوړه کچه، ملاتړ کوو، څو داسې محلي حللارې وړاندې کړي چې د مالیه ورکوونکو لپاره ښه ارزښت ولري او د پرېکړو بهیر چټک کړي.»
د ویتبي ښاروالې، الیزابت رای (Elizabeth Roy)، ویلي چې د سروې پایلې «ډېر روښانه پیغام» ورکوي چې اوسېدونکي غواړي د سیمهییز رییس په ټاکلو کې مستقیم غږ ولري.
رای وصال ټلویزیون ته وویل، دا موندنې ښيي چې اوسېدونکي غواړي په دې اړه نظر ولري چې څوک د سیمهییزې شورا مشري کوي او د ډرهم سیمې د راتلونکي په لارښوونه کې رول لري.
رای په اپرېل میاشت کې یو وړاندیز وړاندې کړی و چې له سیمهییزې شورا یې غوښتل یو ځل بیا دا دریځ تایید کړي چې سیمهییز رییس باید د خلکو له خوا انتخاب شي. شورا دغه وړاندیز تصویب کړ.
رای وویل، د ټاکل شوي، نه انتخاب شوي، سیمهییز رییس په اړه د هغې اصلي اندېښنه حسابورکونه ده.
هغې وویل: «ښاروالۍ مشران هغه وخت پیاوړي وي چې مستقیماً د هغو اوسېدونکو پر وړاندې حسابورکوونکي وي چې خدمت ورته کوي.»
هغې استدلال وکړ چې ټاکل شوی رییس به د ډرهم اوسېدونکو پر ځای صوبايي حکومت ته ځواب ویونکی وي.
رای زیاته کړه: «اوسېدونکي حق لري چې د هغه مشر په ټاکلو کې مستقیم غږ ولري چې د دې پرېکړو په لارښوونه کې مرسته کوي.»
د درهم اوسنی سیمهییز رییس، جان هنري (John Henry)، هم د دې بدلون مخالفت کړی دی.
هنري د مې په میاشت کې د قانون له تصویب وروسته وویل، د سیمهییز رییس د انتخاب لپاره د خلکو د حق لرې کول د اوسېدونکو او سیمهییزې مشرتابه ترمنځ یو مهم تړاو پرې کوي.
هنري په یوه اعلامیه کې وویل: «ډیموکراسي هغه وخت پیاوړې وي چې مشرتابه د خلکو د باور له لارې ترلاسه شي، نه د ټاکنې له لارې ورکړل شي.»
هنري همدارنګه د ۲۰۱۰ کال د ډرهم ټولپوښتنې ته اشاره وکړه چې په کې شاوخوا ۸۰ سلنه رایه ورکوونکو د سیمهییز رییس د انتخابي کېدو ملاتړ کړی و.
د اوشاوا اوسېدونکې، پگاه محبزاده، وايي اندېښنه لري چې د سیمهییز رییس ټاکل به محلي ډیموکراسي او حسابورکونه کمزوري کړي.
محبزاده وصال ټلویزیون ته په ایمیل کې وویل: «زه باور لرم چې هېڅوک د یوې ټولنې لپاره تر هغو اوسېدونکو ښه پرېکړه نه شي کولی چې په هماغه ټولنه کې ژوند کوي. حکومت باید اوسېدونکو ته اجازه ورکړي چې خپل سیمهییز رییس د ټاکنو له لارې وټاکي.»
دغه قانون د اونټاریو د اپوزیسیون ګوندونو له انتقاد سره هم مخ شوی دی.
د اونټاریو د نوي ډیموکرات ګوند وکیلانو، وین ګېټس (Wayne Gates) او جېني سټېونز(Jennie Stevens)، دا قانون پر محلي ډیموکراسۍ برید بللی او خبرداری یې ورکړی چې دا یو نه انتخاب شوي چارواکي ته ډېر واک ورکوي.
د اونټاریو د ښاروالیو ټولنې هم د انټاریو له ایالتي حکومت غوښتي چې په دغو بدلونونو بیا غور وکړي.
یادې ټولنې ویلي چې د سیمهییزې مشرتابه په اړه پرېکړې باید د محلي خلکو په لاس کې پاتې شي او د سیمهییزو رییسانو ټاکل او هغوی ته د قوي رییس واکونه ورکول یې «په بنسټیز ډول غیردیموکراتیک» بللي دي.
دا ټولنه وايي، سیمهییز رییسان باید مستقیماً د محلي رایه ورکوونکو پر وړاندې حسابورکوونکي پاتې شي.
Views: 16