پاکستاني چارواکو ویلي چې د پنجاب ایالت د جهلم ولسوالۍ کې د زلزلې له امله یوه کس ژوند له لاسه ورکړی او ۱۱ نور ټپیان شوي دي.
د ډان ورځپاڼې د راپور له مخې، دغه زلزله د سېشنبې په ماښام د جهلم ولسوالۍ اړوند د پنډ دادنخان تحصیل د جلالپور شریف په سیمه کې شوې او شاوخوا ۱۰ کورونو ته یې سخت زیان اړولی دی.
د جهلم مرستیال کمېشنر میر رضا اوزګن ویلي، پولیس، ژغورنې ډلې او ځايي اداره سیمې ته رسېدلې او د ژغورنې عملیات او د زیانونو ارزونه روانه ده.
د پاکستان د هوا پېژندنې ادارې ویلي چې د دغې زلزلې شدت د ریښتر په کچه ۴.۸ درجې و، د ځمکې له سطحې ۱۲ کیلومتره ژوره رامنځته شوې او مرکز یې د جهلم سوېل لوېدیځ ته ۵۸ کیلومتره لرې و.
Views: 14
