د امریکا یوه لوړپوړي پوځي چارواکي ویلي چې واشنګټن پر ټایوان د ۱۴ میلیارده ډالرو په ارزښت د وسلو پلور موقتاً ځنډولی، څو له ایران سره د احتمالي جګړې لپاره اړین مهمات خوندي پاتې شي.
د الجزیرې د راپور له مخې، د امریکا د بحري ځواکونو سرپرست هانګ کایو د پنجشنبې په ورځ د امریکا د سنا د دفاعي بودیجې فرعي کمېټې غونډې ته ویلي چې دغه ځنډ د دې لپاره دی چې ډاډ ترلاسه شي امریکا د ایران پر ضد احتمالي پوځي عملیاتو لپاره کافي مهمات لري.
هغه زیاته کړې: «فعلاً مو د وسلو پلور ځنډولی څو ډاډ ترلاسه کړو چې اړین مهمات لرو، بهرنی پوځي پلور به په مناسب وخت کې بیا پیل شي.»
دغه څرګندونې یوه اونۍ وروسته له هغه کېږي چې د ټایوان لپاره د وسلو د پلور موضوع د امریکا ولسمشر دونالد ټرمپ او د چین ولسمشر شي جینپینګ په بیجینګ کې د لیدنې پر مهال د خبرو یو مهم محور ګرځېدلی و.
کائو ویلي چې د دې معاملې د دوام یا لغوه کولو وروستۍ پرېکړه به د امریکا د دفاع وزیر پیت هیګسټ او د بهرنیو چارو وزیر مارکو روبیو په لاس کې وي، چې دا معامله د ټایوان لپاره د امریکا تر ټولو لویه پوځي بسته ګڼل کېږي.
ورته مهال، د ټایوان لومړي وزیر چو جونګتای ویلي چې ټایوان لا هم له امریکا څخه د وسلو د اخیستلو په لټه کې دی.
Views: 1
