د مکسیکو چارواکو ویلي چې د دغه هېواد په سوېلختیځ کې د تاباسکو ایالت د مرکز ویاهرموسا ښار په یوه نندارتون کې د پراخې اورلګېدنې له امله لږ تر لږه پنځه کسان مړه شوي دي. دغه اورلګېدنه د پنجشنبې په سهار هغه مهال رامنځته شوې چې د موسیقۍ یو کنسرت روان و او زرګونه کسانو پکې ګډون درلود.
په رسنیو او ټولنیزو شبکو کې خپاره شوي انځورونه ښيي چې لسګونه کسان داسې مهال له سیمې تښتېدل چې تور لوګي د سیمې اسمان پوښلی و.
د تاباسکو ایالت والي خاویر مای د قربانیانو له کورنیو سره د خواخوږۍ څرګندولو ترڅنګ ویلي چې ځیني مړه شوي کسان د نندارتون غرفهلرونکي وو چې ونه توانېدل پر وخت سیمه پرېږدي.
هغه همداراز ویلي چې د پېښې د علت معلومولو لپاره څېړنې پیل شوې او زیانمنو سوداګرو او کاروبارونو ته د اقتصادي مرستو پلان هم تر لاس لاندې نیول شوی دی.
Views: 13