د اسټراليا په ملبورن ښار کې د ملي مرکې لومړۍ ناسته د ګڼ شمېر سیاسي، علمي، فرهنګي شخصیتونو او مدني فعالانو په ګډون ترسره شوه. ګډونوالو د هېواد پر بنسټيزو ستونزو ژور بحثونه وکړل، لومړيتوبونه يې په ګوته کړل او د ستونزو د حل لپاره يې عملي او بنیادي حللارې وړاندې کړې.
ناسته د نقیب مومند په کوربهتوب او د ممتاز امین په پرانیستونکې وینا پیل شوه. امین ملي مرکه د سولې، پخلاینې او ملي یووالي لپاره یوه بنسټیزه اړتیا وبلله او د ملبورن ناسته یې د اسټرالیا مېشتو افغانانو د انسجام او همغږۍ په لور يو مهم ګام وګاڼه.
په لومړۍ برخه کې، ډاکټر عجبنور د ملي مرکې موخې، لرلید او اصول بیان کړل، په ترسره شويو کارونو او راتلونکو پلانونو يې رڼا واچوله او ټینګار یې وکړ چې دا بهیر په ملي او نړيواله کچه د افغانانو ترمنځ د یووالي، همغږۍ او ملي اجماع د رامنځته کولو لپاره پیل شوی دی.
د ناستې په دویمه برخه کې د ډاکټر نصیر ملکزي، محبوبه بابکرخېل او جاويد مقصودي په مدیریت ژور او تخصصي بحثونه ترسره شول. دا بحثونه په درېیو اصلي محورونو کې متمرکز وو:
۱. د هېواد بنسټیزې ستونزې
ګډونوالو د هېواد د اوسني وضعیت په اړه لاندې مهمې ستونزې یادې کړې:
ـ د مشروع نظام او اساسي قانون نشتوالی
ـ قومي نفاق، ټولنیزه بېباوري او د ملي یووالي کمزورتیا
ـ د بشري حقونو نقض، په ځانګړي ډول د ښځو د تعلیم او کار محدودیت
– د ښوونځي او مدرسې تر منځ ( ديني او عصري زده کړې) تقابل
ـ اقتصادي بحران، بېکاري او پراخ مهاجرتونه
ـ د مهاجرینو کړکېچ، په ځانګړي ډول په پاکستان او ايران کې د افغانانو ناوړه وضعیت
۲. حللارې او وړاندیزونه
ګډونوالو د ستونزو د حل لپاره لاندې عملي وړاندیزونه مطرح کړل:
ـ په ملي کچه د خبرو اترو د یو منظم چوکاټ جوړول
ـ د سیاسي اجماع لپاره د لارنقشې جوړول او د يوې لويې جرګې لپاره د زمينې برابرول
ـ د افغانانو ترمنځ د باور، یووالي، متقابل احترام او يوبل منلو فرهنګ پیاوړي کول
ـ د اقتصادي ستونزو د کمولو لپاره د اقتصادي بنسټونو او کاروباري فرصتونو رامنځته کول
ـ د افغانانو د يوه ګډ ملي ادرس جوړول او د يوه ګډ غږ او دريځ موندل
۳. د افغان ډیاسپورا رول
ګډونوالو ټینګار وکړ چې افغان ډياسپورا يا بهر مېشته افغانان بايد لاندې برخو ته پام وکړي:
ـ د هر ډول تعصباتو پر وړاندې مبارزه او د افغان ډياسپورا په کچه د ملي يووالي او ګډ غږ او دريځ لپاره منظمې هڅې
ـ په اسټراليا کې د افغاني ټولنو، بنسټونو او شوراګانو تر منځ د همغږۍ او همکارۍ نېټورک جوړول
ـ د ستونزو د حل لپاره د تخصصي شبکو جوړول
ـ نړیوالو مراجعو ته د افغانانو د غږ رسول او د ستونزو په حل کې د ملاتړ غوښتنه
– د ښځو د حقونو لپاره مبارزه او د نجونو د تعليم لپاره د عملي لاروچارو موندل
– د اسټراليا نورو ښارونو ته د ملي مرکې د څانګو غځول
ګډونوالو د هېواد پر سياسي انزوا، فقر او بېکارۍ او د بشري حقونو پر نقض (په ځانګړي ډول د ښځو پر تعلیم او کار بنديزونه) ژوره اندېښنه څرګنده کړه او ټینګار يې وکړ، چې ملي يووالی، همغږي او انسجام کولای شي د هېواد بنسټيزو ستونزو ته د پای ټکی کېږدي.
غونډې پرېکړه وکړه چې د ملي مرکې څانګې به په ملبورن او د استرالیا په نورو ښارونو کې جوړېږي، ترڅو د افغانانو هڅې لا منسجمې او اغېزناکې شي.
دا ناسته د ملي مرکې يولسمه ناسته وه او د هغو پرلهپسې غونډو په تسلسل ترسره شوه، چې تر دې وړاندې په لندن، برلین، سکرمنتو، کولن، برمینګهم، هامبورګ، تورنتو، والسال او فرانکفورت ښارونو کې ترسره شوې دي.
Views: 36
