د راپورونو له مخې، ایران د پاکستاني چارواکو له لارې چې له امریکا سره په مذاکراتو کې د منځګړي رول لري، له متحده ایالتونو سره د هوکړې لپاره نوی وړاندیز وړاندې کړی خو ایران تر اوسه په دې رسمي څه نه دي ویلي.
اکسیوس خپرونې د سرچینو په حواله راپور ورکړی چې په دغه وړاندیز کې داسې توافق شامل دی چې د هرمز تنګي د بیا پرانیستلو او د جګړې پای ته رسېدو لامل ګرځي، خو په دې اړه نور جزئیات نه دي ورکړل شوي.
په راپور کې ویل شوي: «دغه نوی وړاندیز چې د پاکستاني منځګړو له لارې امریکا ته وړاندې شوی، په لومړي پړاو کې د تنګي د بحران او د امریکا د محاصرې پر حل تمرکز لري.»
د راپور له مخې، د دغه وړاندیز له مخې اوربند د اوږدې مودې لپاره تمدیدېږي او یا هم دواړه لوري د جګړې د دایمي پای ته رسېدو پر سر هوکړه کوي.
همداراز ویل شوي چې د اټومي خبرو اترو بهیر به یوازې په درېیم پړاو کې، د ایران د بحري محاصرې له لرې کېدو وروسته پیل شي.
بل لور ته سپینې ماڼۍ دغه وړاندیز ترلاسه کړی، خو دا نه ده روښانه چې امریکا به یې د څېړلو لېوالتیا ولري که نه.
د سپینې ماڼۍ ویاندې اولیویا وولز اکسیوس ته ویلي: «دا حساسې ډیپلوماټیکې خبرې دي او متحده ایالات د رسنیو له لارې مذاکرات نه کوي.»
ایران تر اوسه پورې په رسمي ډول په دې اړه څه نه دي ویلي؛ خو د دغه هېواد ولسمشر مسعود پزشکیان پرون ویلي وو چې تهران به تر فشار، ګواښ او محاصرې لاندې له امریکا سره «تحمیلي مذاکراتو» ته داخل نه شي.
دا په داسې حال کې ده چې ټاکل شوې وه د روانې اونۍ د شنبې په ورځ د امریکا یو پلاوی د پاکستان پلازمېنې اسلاماباد ته سفر وکړي، خو دغه سفر یې لغوه شوی دی.
Views: 14
