د فراه د امنیې قوماندانۍ ویاند وایي، په تېرو دوو میاشتو کې اته تنه د فراه په سیند کې ډوب شوي دي او له کورنیو یې غوښتي چې خپل ماشومان د نه پریږدي چې سیندونو ته نږدې شي.
د فراه د امنیې قوماندانۍ ویاند او د مطبوعاتي دفتر مسوول، ملا کلیمالله ننګیال، پژواک ته وویل چې د دې ولایت په مرکز او ولسوالیو کې د اوبو د کچې له لوړېدو سره هممهاله، د فراه په سیند کې د ډوبېدو پېښې هم زیاتې شوې دي.
د هغه په خبره، په تېرو دوو میاشتو کې اتو تنو د فراه په سیند کې د ډوبېدو له امله خپل ژوند له لاسه ورکړی دی.
ده د دغو پېښو په اړه د اندېښنې په څرګندولو سره وویل: «له خپلو هېوادوالو غواړو چې له اړتیا پرته د سیند غاړې ته له تلو او په ژورو اوبو کې له لامبو وهلو ډډه وکړي، او له پلرونو او میندو هم غوښتنه کوم چې د خپلو اولادونو ساتنه وکړي او هغوی د فراه سیند ته له تلو منع کړي.»
هغه وویل چې د امید په نوم یو کس په ورستیو ورځو کې د فراه په سیند کې ډوب شوی او تر اوسه یې مړی نه دی موندل شوی.
له بلې خوا، محمد عرفان چې په اوبو کې له ډوبېدو ژغورل شوی ، په اوبو کې ډوبېدل ډېر سخت حالت بولي او له ځوانانو غواړي چې د خپل ژوند د خوندیتوب لپاره په سیندونو کې له لامبو وهلو ډډه وکړي.
د فراه یو اوسېدونکی عنایتالله همدرد وایي، هغه کسان چې په سیند کې لامبو وهي، نه یوازې خپل ژوند له خطر سره مخ کوي او که په ډوب شي خپلې کورنۍ هم له غم سره مخامخوي.
Views: 7
