د ۱۹ هېوادونو د بهرنیو چارو وزیرانو په یوه ګډه اعلامیه کې د لبنان د تاوتریخوالي د سمدستي کمېدو غوښتنه کړې او ټینګار یې کړی چې په دغه هېواد کې د جګړې دوام به د سیمې د تاوتریخوالي د کمېدو بهیر له خطر سره مخ کړي.
په دې ګډه اعلامیه کې د استرالیا، بلجیم، کرویشیا، قبرس، ډنمارک، فنلنډ، فرانسې، یونان، آیسلنډ، ایرلنډ، لوکزامبورګ، مالتا، هالند، ناروې، پرتګال، سلووینیا، هسپانیا، سویډن او بریتانیا د بهرنیو چارو وزیرانو ګډون کړی دی.
په اعلامیه کې ویل شوي چې یاد هېوادونه د لبنان د شاملولو لپاره د سیمې د تاوتریخوالي د کمېدو په بهیر کې د هڅو ملاتړ کوي او له ټولو خواوو غواړي چې د یوه دوامدار سیاسي حل لپاره همکاري وکړي.
د اعلامیې لاسلیک کوونکو د لبنان د ولسمشر میشل عون د هغه نوښت هرکلی کړی چې له اسرائیل سره د مستقیمو خبرو د پیل په موخه وړاندې شوی، او ویلي یې دي چې د اسرائیل له لوري د دغو خبرو منل به په لبنان، اسرائیل او ټوله سیمه کې د دوامدار امنیت لپاره یو مهم فرصت برابر کړي.
په اعلامیه کې له ټولو لورو غوښتنه شوې چې له دې فرصته ګټه واخلي، سمدستي تاوتریخوالی راکم کړي او د امریکا او ایران ترمنځ له موجود اوربند څخه استفاده وکړي.
په اعلامیه کې د حزبالله له لوري پر اسرائیل بریدونه غندل شوي او د دغو بریدونو د درولو غوښتنه شوې ده.
همداراز، د اپرېل په اتمه نېټه پر لبنان د اسرائیل پراخ بریدونه هم غندل شوي، چې د لبناني چارواکو د راپور له مخې په کې له ۳۵۰ ډېر کسان وژل شوي او تر زرو ډېر نور ټپیان شوي دي.
یادو هېوادونو ټینګار کړی چې د نړیوالو بشردوستانه قوانینو له مخې د ملکي وګړو او ملکي تاسیساتو ساتنه اړینه ده.
په اعلامیه کې پر د ملګرو ملتونو د سولهساتو ځواکونو (یونیفل) بریدونه هم په کلکه غندل شوي او د دغو ځواکونو د خوندیتوب پر تأمین ټینګار شوی دی.
لاسلیک کوونکو د لبنان له خلکو او حکومت څخه خپل بشپړ ملاتړ اعلان کړی او ویلي یې دي چې چمتو دي د لبنان له حکومت سره په همغږۍ کې له یو میلیون څخه زیاتو بېځایه شویو سره بېړنۍ مرستې وکړي.
په پای کې، دغو هېوادونو د لبنان د ځمکنۍ بشپړتیا او ملي حاکمیت پر ساتنې ټینګار کړی دی.
Views: 1
