د افغانستان د سولې په چارو کې د امریکا پخوانی استازی زلمي خلیلزاد وايي، د پاکستان د پوځ ویاند احمد شریف چودري له خوا د طالبانو او متحده ایالاتو ترمنځ د دوحې تړون په اړه شوی برداشت «اشتباه» دی، ځکه دا تړون یوازې د افغانستان او امریکا ترمنځ دی.
خلیلزاد پر خپله ایکس پانه لیکلي چې احمد شریف چودري په خپله وروستۍ وینا کې د متحده ایالاتو او طالبانو ترمنځ د دوحې تړون ته اشاره کړې، خو دا چې هغه دا تړون د افغانستان او پاکستان ترمنځ اړوند ګڼي، دا یوه ناسمه انګیرنه ده.
هغه زیاته کړې: «خو دا مفکوره په پای کې یوې جالبې نظریې ته لاره هواروي. په حقیقت کې، د افغانستان او پاکستان ترمنځ یو ورته تړون، چې په کې دواړه هېوادونه ژمن شي هېڅ فرد یا ډلې ته، د داعش او تحریک طالبان پاکستان په ګډون، اجازه ور نه کړي له خپلې خاورې د بل هېواد د امنیت د ګواښ لپاره له خپلې خاورې کار واخلي، او همدارنګه ومنل شي چې د درېیمګړي له لوري په دې اړه څارنه وشي، دا کولای شي د دواړو هېوادونو لپاره ګتور وي.»
هغه وايي، د هغو وروستیو خبرو پر بنسټ چې د طالبانو له مشرانو سره یې کړې دي، هغوی چمتو دي چې د داسې یوه تړون په اړه خبرې وکړي.
خلیلزاد وایي دا به د افغانستان او پاکستان ترمنځ په اړیکو کې یو بنسټیز بدلون رامنځته کړي.
د افغانستان د سولې په چارو کې د امریکا پخواني استازي یادونه کړې چې دا مهال توپ د پاکستان په میدان کې دی.
د راپورونو له مخې، د پاکستان د پوځ ویاند احمد شریف چودري یو ځل بیا پر تورونو لاس پورې کړی او ادعا یې کړې چې افغانستان د «نړیوالې ترهګرۍ» په مرکز بدل شوی دی.
د طالبانو ویاند ذبیحالله مجاهد تېره شپه پر خپله اېکس پاڼه لیکلي چې د پاکستان د پوځ د ویاند وروستۍ څرګندونې نه یوازې له واقعیت سره هېڅ تړاو نه لري، بلکې د یو مسوول پوځ له موقف او معیارونو سره هم په ښکاره ټکر کې دي.
Views: 1