د افغانستان پخواني ولسمشر حامد کرزي پر «کابل او پکتیکا» د پاکستان هوايي بریدونه په سختو ټکو غندلي او هغه یې له نړۍوالو قوانینو څخه ښکاره سرغړونه، د حاکمیت نقض او د افغانستان پر حریم تېری بللی دی.
د افغانستان مخکیني ولسمشر پر خپله اېکسپاڼه لیکلي چې «د افغانستان او سیمې پر وړاندې د پاکستان پالیسۍ غیرمسوولانه دي او ناوړه پایلې پکې په پام کې نه نیول کېږي او هغه ستونزې چې نن پاکستان ورسره لاس او ګرېوان دي، د همدغو ناسمو پالیسیو پایلې دي.»
هغه ټینګار وکړ چې پاکستان باید د تاوتریخوالي پر ځای د ګاونډیتوب حقونو او نړۍوالو قوانینو ته په کتو، پر خپلو ناسمو او زیان رسوونکې پالیسیو بیا غور وکړي او د دوستانه او ښو اړیکو له مخې له افغانستان سره د تعامل لاره غوره کړي.
دغهراز، سیمهییزو سرچینو ویلي چې تېره شپه پاکستان د پکتیکا ولایت په برمل ولسوالۍ کې مرغه بازار بمبار کړی چې له امله یې درې دوکانونه سوځېدلي، خو مرګژوبله یې نه ده اړولې.
دغه راز د پخواني حکومت د ملي مصالحې عالي شورا رئیس ډاکټر عبدالله عبدالله، ، د پاکستان د هوايي بریدونو غندنه کړې او دا یې د افغانستان د ځمکنۍ بشپړتیا څرګند نقض بللی دی.
عبدالله د خپلې فېسبوک پاڼې له لارې لیکلي: «د کابل ښار او پکتیکا ولایت باندې وروستي هوايي بریدونه د هېواد د ځمکنۍ بشپړتیا ښکاره نقض دی او موږ یې په کلکو ټکوغندو.»
هغه زیاته کړې ده چې هر ډول پوځي اقدام د افغانستان د خاورې دننه د نړیوالو قوانینو ښکاره سرغړونه ده او د ښه ګاونډیتوب اصولو او د ملګرو ملتونو له منشور سره په ښکاره ټکر کې دی.
عبدالله ویلي: «د افغانستان خلک له ټولو هېوادونو، په ځانګړې توګه له ګاونډیو څخه د خپل هېواد د حریم بشپړ درناوی غواړي.»
نوموړي ټینګار کړی: «موږ باور لرو چې هر ډول شخړه باید د منطق، ډیپلوماټیکو لارو او رغوونکو خبرو اترو له لارې حل شي، نه د زور او برید له لارې.»
دا څرګندونې وروسته له هغې کېږي چې د طالبانو د دفاع وزارت هم د پاکستان هوايي بریدونه «بېساري او تاوتریخوالي ډک اقدام» بللي او خبرداری یې ورکړی چې که وضعیت لاپسې کړکېچن شي، مسؤلیت به یې د پاکستان پر پوځ وي.
Views: 9
