د ایران د بهرنیو چارو وزیر سیدعباس عراقچي تېره شپه په یو ورځني سفر پاکستان ته تللی دی.
د ایران ایرنا دولتي خبري اژانس په یوه راپور کې لیکلي چې د ایران د بهرنیو چارو وزیر سیدعباس عراقچي تېره شپه د پاکستان پلازمېنې اسلاماباد ته تللی دی.
په راپور کې راغلي، عراقچي به د دوه اړخیزو اړیکو د پیاوړتیا او همدارنګه د سیمهییزو او نړۍوالو پرمختګونو په اړه له پاکستاني چارواکو سره خبرې وکړي.
سرچینې زیاته کړې، د بهرنیو چارو وزیر به په دې یو ورځني سفر کې د نورو چارواکو ترڅنګ د پاکستان له ولسمشر او لومړي وزیر سره هم لیدنې ولري.
د ایران د بهرنیو چارو وزیر داسې مهال اسلاماباد ته سفر کوي چې د پاکستان او هند اړيکې، د روانې (غویي) میاشتې په درېیمه د هند تر کنټرول لاندې د کشمیر په پهلګام کې پر سیلانیان تر وسلهوال برید وروسته – چې ۲۶ کسان پهکې ووژل شول او ۱۷ نور ټپیان شول – ترینګلې شوې دي.
Views: 1
