د لوړو زدهکړو د ځینو لغوه شوو موسسو مسوولین او ځینې زدهکړیالان وایي، د موسسو د لغوه کېدو پر پرېکړه دې بیا کتنه وشي، خو د لوړو زدهکړو وزارت د وضاحت ترڅنګ دغه پرېکړه پرځای بولي، وایي چې د یادو موسسو محصلین به له ازموینې وروسته د زدهکړو نورو موسسو ته معرفي شي.
تېره ورځ د لوړو زدهکړو وزارت ویلي و چې د هېواد په نهو ولایتونو کې یې د لوړو زدهکړو د ۱۱ خصوصي موسسو جوازونه، علمي، تدریسي او اداري اصولو ته د نه ژمنتیا له امله لغوه کړي دي.
د یاد وزارت د معلوماتو له مخې، د غزني د سلطان محمود غزنوي، د فراه د ابونصر، د بادغیس د حنظله او حکمت، د تخار د فجرستان، د کندز د نمر، د بغلان رویان او قدس، د بلخ سادات، د سمنګان مولانا جلالالدین بلخي او د هرات د الغیاث د لوړو زدهکړو موسسو جوازونه لغوه شوي دي.
پژواک خبري اژانس د لوړو زدهکړو وزارت د اکاډمیکو چارو د څارنې او ارزونې ریاست د یوه راپور کاپي ترلاسه کړې چې د یادو ۱۱ موسسو د تړل کېدو د لاملونو په اړه یې وضاحت ورکړی.
راپور کې راغلي چې د ثبت شوو شمېرو له مخې، په یادو موسسو کې باید په ټولیز ډول ۲۴۹۸ محصلینو شتون لرلای خو د دغه وزارت د ارزونې پرمهال په دغو ټولو موسسو کې ۳۰۱ تنو محصلینو شتون درلود او نږدې ۸۸ سلنه محصلینو شتون نه درلود.
سرچینه زیاتوي چې د فجرستان په موسسه کې له ۶۹ محصلینو څخه یو تن، په رویان کې له ۲۳۶ محصلینو څخه یو تن، نمر کې له ۱۲۱ تنو محصلینو لس تنه، قدس کې له ۲۲۲ محصلینو یو محصل هم شتون نه درلود، په سادات کې له ۵۸۸ محصلینو ۸ تنو، په مولانا جلال الدین بلخي کې له ۹۰ محصلینو ۲۱ تنو، په سلطان محمود غزنوي کې له ۵۸۷ محصلینو ۷۲ تنو، به ابونصر کې له ۸۵ محصلینو لسو تنو، په الغیاث کې له ۵۲ تنو ۳۷ تنو، په حنظله کې له ۱۸۶ محصلینو ۳۸ تنو او په حکمت موسسه کې له ۲۶۲ محصلینو ۱۰۳ تنو شتون درلود.
په راپور کې راغلي چې د لوړو زدهکړو په یادو موسسو کې بېلابېلو نورو سرغړونو هم شتون درلود.
د سرچینې د معلوماتو له مخې، د حاضریو نه شتون، د دایمی استادانو نشتوالی، د ځینو قراردادي استادانو د قراردادونو نه شتون، د څو تنو له خوا د حاضریانو ډکول او ځینې نورې له یادو سرغړونو دي چې ځینې یې په ټولو او ځینې یې په ځینو موسسو کې موجودې وې.
په دې اړه د جزیاتو لپاره د لوړو زده کړو وزارت د ارزونې بشپړ راپور ولولئ.
تخار کې د فجرستان د لوړو زدهکړو موسسې مشر هاشم فرنود وایي چې د خصوصي تحصیلي بنسټونو د ارزونې لپاره یوه ځانګړې کړنلاره شته چې باید له مخې یې دغه ارزونه ترسره شوې وای.
دی وایي، په دغه کړنلاره کې راغلي چې د سرغړونو په صورت کې باید لومړی توصیه وشي، بیا اخطار ورکړل شي او بیا جریمه کړل شي.
هغه زیاتوي: «وزارت وایي چې تاسو خیالي محصلین او خیالي استادان لرئ، زه وایم نه یې لرم، وزارت پرته له دې چې له موږ سره یې شریک کړي خپله ارزونې یې کړې او تللی دی، دا باید یو بل بنسټ وارزوي چې زه خیالي محصل او استاد لرم او که یې نه لرم.»
د مولا محمدجلالالدین بلخي د موسسې رئیس قاري ذبیحالله حاجیزاده هم وایي: «دا پرېکړه غیرعادلانه ده، اړتیا نه وه چې دغه پرېکړه شوې وی، که چېرې کومې موسسې سرغړونه کوله، دلته اصول دي، قوانین دي، باید توصیه ورته شوې وی، اخطار ورکړی شوی وی، جریمه شوی وی، کارونه یې په وزارت کې ځنډول شوی وی، په پنځمه او شپږمه مرحله کې باید دا کار شوی وی. زه ډېر زیات خپه یم چې په یوه لرې پراته ولایت کې یو پوهنتون فعالیت وکړي او بیا داسې کار ورسره وشي.»
دی وایي چې دوې میاشتې مخکې یو پلاوی ورغلی و خو په دې اړه چې کوم کارونه یې مثبت و او کوم د اصولو خلاف وو، کوم راپور نه دی ورسره شریک شوی.
هغه هیله څرګنده کړه چې لوړو زده کړو وزارت په دې اړه بیا کتنه وکړي؛ ځکه چې هلته بل خصوصي پوهنتون نشته او دی د خپلو محصلینو برخلیک ته اندېښمن دی.
خو د لوړو زده کړو وزارت ویاند ضیاءالله هاشمي پژواک خبري اژانس ته وویل چې د پوهنتونونو د جواز د لغوې پرېکړه په یوه ځل نه ده شوې او هر موسسې ته څو ځله د ارزونې پلاوی ورغلي او له توصیې او اخطاریې وروسته دغه پرېکړه شوې ده.
په غزني کې د سلطان محمود غزنوي د لوړو زده کړې موسسې د حقوقو پوهنځي محصل عنایت الله وایي، د زدهکړو په برخه کې دا ډول پرېکړې تر ټولو ډېر محصلین اغېزمنوي او له ستونزو سره یې مخ کوي.
هغه وایي: «په دې خاطر موږ مجبور یو، چې یو بل پوهنتون ته تبدیلي وکړو، زموږ تبدیلي به ډیر وخت ونیسي.»
خو د لوړو زدهکړو وزارت ویاند ضیاءالله هاشمي پژواک خبري اژانس ته وویل چې یادو محصلینو په خپله له خپل ځان سره ظلم کړی، پیسې به یې ورکولې او درسونو ته به نه ورتلل.
دی وایي چې بیا هم د همکارۍ په موخه له یادو محصلینو څخه ازموینه اخیستل کېږي او وروسته له هغې به د زدهکړو د دوام لپاره نورو پوهنتونونو ته معرفي شي.
Views: 5
