د راپورونو له مخې، د سېشنبې په سهار اوکرایني سرتېري د روسیې کورسک سیمه کې د روسیې خاورې ته ننوتلي و او په دغې سیمه کې بېړنی حالت اعلان شوی دی.
د بيبيسي د راپور له مخې، کرملین ویلي چې له دغو سرتېرو سره د ۱۱ ټانکونو او ۲۰ زغرهوالو موټرو ملاتړ و او وروسته د روسیې ولسمشر ولادیمیر پوتین کیېف تورن کړ چې “لویې پارونې” ته یې لاس اچولی دی.
د راپور له مخې، تازه د کورسک سیمې سرپرست والي الکسي سمیرنوف ویلي چې “دې سیمې ته د دښمن د راتلونکو ځواکونو د پایلو خنثی کولو لپاره” اقدام ته اړتیا ده.
هغه له دې مخکې ویلي وو چې زرګونه کسان له سرحدي سیمو ایستل شوي او له شاوخوا ښارونو ډاکټران ورغوښتل شوي دي.
د اوکراین د پارلمان یوه غړي اولېکسیي هونچارینکو د چهارشنبې په ماښام ویلي چې د اوکراین پوځ د کورسک اړوند سودژا ښار کې د ګازو مرکز تر خپل کنټرول لاندې راوستلی دی.
نوموړي پر فېسبوکپاڼه – چې اصلیت یې نه دی تصدیق شوی – زیاته کړې: «زموږ ماموریت د روسیې ماتول دي؛ موږ اړتیا لرو چې د دوی خاوره ماته کړو، اړتیا لرو دښمن هر ځای چې وي، له منځه یې یوسو.»
هغه ویلي چې دی د روسیې خاورې ته د ننوتلو “پلان” پر اهدافانو نه پوهېږي، خو دا به «اروپایانو او امریکایانو ته وښيي چې … پر روسیې برید کېدای شي او اړتیا ده چې وشي.»
کیېف له دې مخکې کله د پولې پورې غاړې د بریدونو په اړه څه نه وو ویلي.
د روسیې د پوځ لوی درستیز جنرال والېري ګېراسیموف د چهارشنبې له غرمې وروسته په یوه خپره شوې ټلوېزیوني وینا کې ولسمشر پوتین ته وايي، دا چې روسي ځواکونو “نېغ په نېغه د روسیې – اوکراین پولې ته په ورڅېرمه سیمو کې د دښمن ځواکونو ځپلو ته دوام ورکړی” نو کورسک سیمې ته “پرمختګ” درول شوی دی.
ښاغلي ګېراسیموف ویلي، تر ۱۰۰۰ پورې اوکرایني پوځیان په دې موخه دې سیمې ته ورننوتي وو چې د سودژا ښار شاوخوا سیمې ونیسي.
هغه ادعا کړې چې روسي ځواکونو له دوی شاوخوا ۱۰۰ کسان وژلي او ۲۱۵ نور یې ټپیان کړي دي.
Views: 16
