د خېبر پښتونخوا په ډېره اسماعیل خان سیمه کې د یوه موټربم ځانمرګي برید په پایله کې ۲۳ تنه پاکستاني سرتېري وژل شوي دي.
پاکستانیو رسنیو د لېندۍ په ۲۱مه، خبر ورکړی چې دا پېښه نن سهار وخته په شاوخوا بجو د ډېره اسماعیل خان ولسوالۍ په درابن سیمه کې رامنځته شوې ده.
د پاکستان د پوځ د عامه اړیکو دفتر څخه په یوه خپره شوې خبرپاڼه کې راغلي چې ځواکونو یې د ډېره اسماعیل خان په بېلا بېلو سیمو کې د وسله والو د فعالیتونو په اړه راپورونه ترلاسه کړي وو.
سرچینې زیاته کړې، چې ځواکونو یې د ډېره اسماعیل خان په درازند سیمه کې عملیات وکړل او ۱۷ وسله وال یې و وژل شو.
په خبرپاڼه کې راغلي، چې وروسته وسله والو د درابن په سیمه کې د امنیتي ځواکونو له یوه مرکز سره خپل موټر بم وجنګولو چې د چاودنې له امله ودانۍ ړنګه شوه او ۲۳ سرتېري و وژل شول.
سرچینې ویلي چې دلته هم نښته وشوهmچې په پایله کې یې شپږ بریدګر و وژل شول.
د پاکستان پوځ دغه راز ویلي چې په کلاچي سیمه کې هم د عملیاتو پر مهال ګڼ شمېر وسله وال او د پوځ دوه سرتیري وژل شوي دي.
د تحریک جهاد پاکستان په نامه یوې ډلې د دې برید مسوولیت په غاړه اخیستی دی.
بلخوا د راپورونو له مخې، د پاکستان د بهرنیو چارو وزارت د افغانستان سفارت سرپرست غوښتی او د دې برید په اړه یې ورته اعتراض او احتجاج کړی دی.
سرچینې زیاته کړې، پاکستان له افغانستانه غوښتي دي چې په خپله خاوره کې د پاکستان د حکومت وسله والو مخالفینو ته د فعالیت اجازه ورنه کړي، خو د افغانستان سرپرست حکومت پخوا دا ډول ادعاوې رد کړې دي.
Views: 19