د ایران د بشري حقونو سازمان – چې مقر یې د ناروې په اسلو ښار کې دی – وايي، پرون ایران کې د دوو افغانانو په ګډون ۲۹ کسان اعدام شوي خو د ایران دولت تر اوسه په دې اړه څه نه دي ویلي.
د ایران د بشري حقونو سازمان تېره شپه پر خپله اېکسپاڼه لیکلي: «نن سهار (د زمري۱۷مه) په قزلحصار کرج او مرکزي کرج (ندامتګاه) کې په ډلهییزه توګه د ۲۹ زندانیانو د اعدام حکم چې دوه یې افغانان او یو یې بلوچ و او د قصدي قتل، نشهیي توکو، جنسي تیري تورونو له امله په قصاص یا اعدام باندې محکوم وو، پلي شو.»
د یاد سازمان مدیر محمود امیري مقدم ویلي: «د نړۍوالې ټولنې د فوري غبرګون نه کولو له امله شاید راتلونکو میاشتو کې سلګونه کسان د اسلامي جمهوري د وژنې ماشین قرباني شي. ټول هغه هېوادونه چې له اسلامي جمهوري سره ډیپلوماټیکې اړیکې لري، اړ دي چې د دغه ډول جنایتونو پر وړاندې د لا ډېرو جنایتونو مخنیوي په موخه غبرګون وښيي.»
د ایران د بشري حقونو سازمان د زمري په څوارلسمه په یوه راپور کې ویلي وو چې د روان زېږدیز کال په لومړیو اوو میاشتو کې په دغه هېواد کې ۳۰۰ تنه اعدام شوي چې ۲۰ تنه یې افغانان دي.
دا په داسې حال کې ده چې د طالبانو مرستیال ویاند حمدالله فطرت تېره ورځ په یوه انځوریز پیغام کې وویل: «تاسو ته معلومه ده چې په ایران کې میلیونونه افغانان ژوند کوي او طبعاً چې دوی به جرایم او نور مشکلات ولري، د افغانستان اسلامي امارت له ایراني اړخونو سره د افغان بندیانو د را انتقال برخه کې پرله پسې ناستې کړي او ښه همغږي رامنځته شوې ده، په دې برخه کې ډېر پرمختګ هم شوی دی.»
فطرت وایي چې تر دې مهاله شاوخوا څلور زره افغان بندیان افغانستان ته را انتقال شوي دي.
هغه ویلي وو: «کله کله موږ په ایران کې د افغان بندیانو لپاره د اعدام او نورو سزاګانو د اورولو خبرونه اورو، په دې اړه زموږ غوښتنه دا ده چې له افغاني بندیانو سره دې احتیاط وشي او د افغانستان له عدلیې او قضایي ارګانونو سره په ګډه همغږۍ دې دغه بندیان هم افغانستان ته را انتقال شي او د افغانستان د قوانینو له مخې دې سزا وویني.»
Views: 15
