اېجاېمسياېس هایدا (HMCS Haida) د کاناډا شاهي حکومت جنګي بېړۍ ده؛ د کاناډا سمندري ځواکونو له ۲۷ بېړیو یوازېنۍ روغه وتلې دا جنګي بېړۍ له ۱۹۴۳ څخه تر ۱۹۶۳ کلونو پورې د شاهي کاناډا په سمندري ځواکونو کې شل کاله کارول شوې ده؛ په دویمه نړېواله، د کوریا او سړې جګړو کې کارېدله ده.
د هایدا په نوم دې بېړۍ له ۱۹۴۳ څخه تر ۱۹۴۵ کلونو پورې په دویمه نړېواله جګړه کې د کاناډا د نورو بېړیو په پرتله د جګړې د نورو خواوو ډېرې بېړۍ ډوبې او زیانمنې کړې دي.
هایدا له ۱۹۴۵ څخه تر ۱۹۵۲ کال پورې د کوریا په جګړه کې کارول شوې او وروسته د کوریا په اوبو کې په ګزمو بوخته وه.
د هایدا په نوم دا بېړۍ په ۱۹۶۳ کال کې کله چې له کاره ولوېده، د پوځ د متقاعدو افسرانو او متخصیصینو یوې ډلې له خوا – چې د هایدا لوی ګروپ په نوم یادېږي – د کاناډا ټورنتو ښار ته ولېږدول شوه او هلته نندارې ته کېښودل شوه.
د هایدا یاده جنګي بېړۍ په ۲۰۰۳ کال کې د کاناډا پارکونو ادارې له خوا وپېرل شوه او په اوسني ځای (د انټاریو ولایت هملتون ښار) ته ولېږدول شوه.
په دې جنګي بېړۍ کې ۲۷۰ پوځيانو دنده پر مخ وړه چې یو ځل په جګړه کې لګېدلې هم ده. بېړۍ د پوځیانو لپاره د پخلنځي، ډوډۍ خوړلو، درملنې او خوب ځایونه لري.
له ۱۹۴۳ کال څخه یوازېنۍ پاتې دغه جنګي بېړۍ څلور انچه د لوړې زاویې لرونکي دوه توپونه لري چې تر ۱۵ کیلومتره واټن پورې یې هدف ویشت او د توپ هره مرمۍ یې ۱۶ کسانو درېيم پوړ ته په دښمن د ګوزار لپاره پورته کوله. دا جنګي بېړۍ د رادار په واسطه داسې کنټرولېدونکی ټوپک لري چې په هره دقیقه کې اتیا مرمۍ فیرولای شي، د هوا او سطحي ضد ۳ انچه توپ او د اوبتل ضد کښتۍ ضد وسله هم لري.
دې بېړۍ د اوبو د ژورتوب معلومولو دستګاه، لورې پیدا کوونکی رادار او د اړیکې نیولو، پیغام استولو او څارنې وسایل هم لري.
دا جنګي بېړۍ اوس د کاناډا د پارکونو ادارې له خوا د هملټون په تاریخي سیمه کې د موزیم په توګه د سیلانیانو لپاره نندارې ته اېښې ده.
له ۲۰۱۷ کال راهیسې د پارکونو ساتنې اداره له موهاک کالج سره په همکارۍ د مورنۍ ژبې ورځې پروګرامونه لري چې د ژبې د سفیرانو پروګرام د غیر رسمي ژبو ویونکو لپاره یو ښه فرصت برابروي چې له تاریخي او ملي پارکونو څخه لیدنه او د هغو په اړه معلومات ترلاسه کړي.
دا ځل د مورنۍ ژبې ورځې په مناسبت هغو نوو افغانانو ته چې په پښتو ژبه خبرې کوي، د پارکونو ساتنې اداره او د موهاک کالج د ژبې سفیرانو پروګرام کې د دویمې نړۍوالې جګړې له جنګي بېړۍ د افغانانو لیدنې پروګرام جوړ کړی و او هغوی ته یې په پښتو ژبه د کاناډا د دې تاریخي بېړی په اړه معلومات ورکړل.
Views: 10
