د کاناډا پلازمېنې اوتاوا کې یو شمېر افغانانو د دغه هېواد د پارلمان له یوه غړي سره په لیدنه کې ویلي چې په کاناډا کې دې د افغان کډوالو ستونزو ته رسېدنه وشي او د هرات زلزلهځپلو ته یې هم د مرستې غوښتنه کړې ده.
یو شمېر افغانانو په یوه ناسته کې د کاناډا پارلمان له یوه غړي چندرا اریا سره د افغانانو ستونزې شریکې کړې.
په دې غونډه کې د افغانستان د ولسي جرګې پخوانۍ غړې او په کاناډا کې پخوانۍ افغان سفیرې شینکې کړوخېل وویل چې افغانستان دا مهال له یوه بشري ناورین سره مخ دی او ډېرو مرستو ته اړتیا لري.
هغې زیاته کړه چې د افغانستان زلزلهځپلي هرات ولایت اوسېدونکو هر څه له لاسه ورکړي او ډېرو مرستو ته اړتیا لري.
کړوخېل د کاڼادا پر دولت غږ وکړ چې د افغانستان له مظلوم ملت سره په تعلیمي، بشري او اقتصادي برخو کې مرسته وکړي.
دغه راز د غونډې بل ګډونوال فهیم حکیم وویل، ټول پر دې پوهېږي چې افغانستان ښه وضعیت کې نه دی نو ټول يې باید د ستونزو د حل لپاره هلې ځلې وکړي.
دغه راز هغه زیاته کړه چې کاڼادا ته نوي راغلي افغانان هم له ګڼو ستونزو سره مخ دي چې حکومت یې باید یادو ستونزو ته رسېدنه وکړي.
دغه راز یوه بل کس نصرت رسا وویل چې په اوتاوا ښار کې طبي سیستم کې ستونزې دي، ان افغانان نه شی کولای د ځان لپاره په اسانه یو ډاکټر پيدا کړي.
دغه راز د فغانانو له یادو څرګندونو وروسته د کاناډا پارلمان غړي چندرا اریا وویل چې د هرات زلزلې په لویه غمیزه کې له افغانانو سره ځان شریک بولي او د کاناډا حکومت څخه یې غوښتې دي چې د یادې غمېږی له زیانمنو سره خپله مرسته اعلان کړي.
هغه زیاته کړه، باوري دی چې نوي راغلي افغانان کولای شي په کاڼادا کې خپل تجارت، تعلیم، دولتي وظیفې او نورې چارې پر مخ یوسي.
د اریا په خبره: «موږ تل دا کوشش کړی چې څنګه وکولای شو د کاڼادا خلکو ته خدمت وکړو؛ موږ ته دا مهمه نه ده چې څوک د کوم ځای دي، موږ ته دا مهمه ده چې څوک په کاناډا کې اوسېږي او کاڼادا ته کار کوي.»
هغه وویل چې خلک د کډوالۍ پروسې په اړه شکایت لري خو دوی هڅه کوي هغه کسان کاناډا ته راولي چې واقعاً په ستونزو کې وي.
نوموړي دغه راز زیاته کړه چې افغانستان په ښه وضعیت کې نه دی؛ ډېرو بشري مرستو ته اړتیا لري او هیله يې وښوده چې افغانستان به یو ښه راتلونکی ولري.
د غونډې ګډونوالو د کاناډا له حکومت څخه وغوښتل چې د هرات له زلزله خپلو سره مرسته وکړي او د غونډې په پای کې د یادې زلزلې د زیانمن شوو لپاره مرستې راټولې شوې.
Views: 28
