د کاناډا په ټورنټو ښار کې د یوه کنفرانس ګډونوالو د پاکستان د حکومت له لوري له پښتنو او پلوڅانو سره روان ظلمونه وغندل او د دغه هېواد له چارواکو یې وغوښتل چې نور د بېګناه پښتنو او بلوڅو له وژلو، ځورولو او نیولو لاس واخلي.
په پاکستان کې د ډیموکراسۍ او د مظلومو ملتونو (پښتنو او بلوڅو) د ځورونو د غندنې تر عنوان لاندې دغه کنفرانس د تېرې جمعې په شپه د کاناډا د مسیساګا ښار کې د کاناډا پښتون کونسل (Pashun Council Canada) له لوري جوړ شوی و.
د پښتونخوا د پارلمان پخوانۍ وکیله او د ملي جمهوري غورځنګ غړې جمیله ګیلاني د دې کنفرانس مهمه ویناواله وه چې له وینا وروسته یې په ټورڼټو کې د پښتنو او بلوڅو ګډونوالو پوښتنو ته یې ځوابونه وویل.
د یاد کنفرانس ویناوالو وویل، له ډېرې مودې راهیسې د پاکستان د حکومت له خوا د ډیموکراټیکو او بشري حقونو خلاف کړنې ترسره کېږي او له پښتنو او بلوڅو سره ښکاره ظلم روان دی.
هغوی زیاته کړه چې په پښتونخوا او قبایلي سیمو کې د پوځي عملیاتو او له ترهګرۍ سره د مبارزې په نوم د پښتنو بشري حقونه نقضېږي او له بېانصافیو سره مخ دي.
ویناوالو دغه راز وویل چې بلوچستان کې هم له بلوڅانو سره ورته چلند کېږي او هغوی له پوځي عملیاتو، جبري نادرکه کېدو او اقتصادي شاتګ سره مخ دي او په سیمه کې یې د طبیعي زېرمو پر سر د شخړې او د مرکزي حکومت د سختو عملیاتو له امله ځورول شوي او لا هم ځورول کېږي.
د کنفرانس ویناوالو ادعا وکړه چې بلوڅ او پښتانه د پاکستان د حکومت له خوا په بېلابېلو پلمو ځورول او وژل کېږي او د دغه هېواد له چارواکو یې په کلکه غوښتنه وکړه چې د دغو ټبرونو له ځپلو لاس واخلي.
د هغوی په خبره چې د پښتنو او بلوڅو پر وړاندې د تشدد زیاتېدو په پایله کې په دې وروستیو کې یو شمېر لوی او کوچني غورځنګونه هم رامنځته شوي او د یادو ظلمونو پر وړاندې یې غږ پورته کړی دی.
د یادونې ده، د دغو غورځنګونو لړۍ د اروپایي هېوادونو ترڅنګ امریکا او کاناډا ته هم غځېدلې او دغلته د پاکستان د حکومت له خوا له پښتنو او بلوڅو سره یې روان ظلمونه وخت ناوخت غندلي دي.
Views: 26
