دلته د انټاریو د ساینس مرکز دی؛ دغه مرکز د کاناډا د ټورنټو ښار یو له خورا مشهورو ځایونو ګڼل کېږي.
د ساینس په دغه مرکز کې کولای شئ له سلګونو نندارتونونو او ژوندیو برنامو لیدنه وکړئ، دلته د ساینس او ټکنالوجۍ برخو کې څېړنې، کشف او زدهکړې کېږي.
د انټاریو د ساینس یاد مرکز په ۱۹۶۹ میلادي کال کې د کاناډا د ۱۰۰مې کالیزې نمانځلو پر مهال د سل کلنې پروژې په موخه پرانیستل شو.
د ساینس د دغه مرکز موزیم په نړۍ کې لومړنی موزیم دی چې خلک یې د ساینس برخه کې زدهکړو ته هڅول او دغه راز یې لیدونکو ته اجازه ورکړه څو په دغه موزیم یا نندارتون کې په عملي ډول بېلابېلې علمي تجربې وویني او وکړي.
دغه مرکز پر درېیو اصلي حوزو وېشل شوی چې عبارت دي له: لوی تالار، پراکټر او ګمبل تالار او د ټیلس تالار؛ دغه هر تالار څو نندارتونونه لري چې د ساینس او ټکنالوجۍ اړوند بېلابېل موضوعات تر خپل پوښښ لاندې راولي.
د فضا تالار هغو لیدونکو ته ځانګړی شوی چې له ستورو او فضا سره مینه لري او په دې برخه کې یې څېړنې خوښېږي.
د مریخ او نور اسماني کاڼي هم په دغه مرکز کې لیدلی شئ او د تور سوري او کائناتي وړانګې په اړه معلومات ترلاسه کولی شئ، دلته د فضايي بېړۍ په ډول هم یو څه شته چې تاسو د ستورمزلي په څېر په ډېر سرعت شاوخوا ګرځوي.
دغه راز تاسو کولای شئ د کایناتو لیدلو له مصنوعي ځایه هم لیدنه وکړئ؛ په ټورنټو کې د ستورو د لیدلو یوازېنی عامه ځای چې دلته تاسو کولی شئ د ستورو، سیارو او کهکشانونو په اړه په ژوندۍ بڼه خپرونې او فلمونه وګورئ.
د ماشومانو لپاره ځانګړی پارک چې له اتو کلونو کمعمره ماشومانو لپاره د ساعتتېرۍ او زدهکړو ساحه ده؛ په دغه پارک کې ماشومان کولای شي خپل رولر کاسټر جوړ کړي، په سټيډیو کې موسیقي وغږوي، په مارکېټ کې یو څه وپېري، د انسان د بدن جوړښت، طبیعي چاپېریال او نورو د فزیک په اړه زدهکړه وکړي.
یاد پارک په تنکيو ځوانانو کې د خلاقیت، تجسس او ستونزو حلولو مهارتونو هڅولو لپاره ډیزاین شوی دی.
د اسټرازینیکا انساني څنډه (The AstraZeneca Human Edge) یو نندارتون دی چې د انسان د بدن ظرفیت او محدودیتونه لټوي؛ دلته کولی شئ د انسان حیرانوونکو بریاوو او ننګونو په اړه معلومات ترلاسه کړئ؛ لکه د ایوریسټ څوکې ته ختل او په سخت چاپېریال کې ژوندي پاتې کېدل.
تاسو کولی شئ په دغه نندارتون کې خپلې فزیکي او رواني وړتیاوې هم وازمويئ، لکه ستاسو توازن، حافظه او د برداشت ازموینه.
د (بروس پون ټیپ سالون) هغه نندارتون دی چې د ځمکې پر مخ د ژوند بېلابېلې بڼې او ښکلاوې نندارې ته وړاندې کوي؛ تاسو کولای شئ په (تیلوس) باراني ځنګلونو کې قدم ووهئ، دا ځنګلونه یو استوايي ایکوسیسټم دی چې زهرجنې چنګښې، ګلان او د کېلو ونو په ګډون تر ۵۰ ډېر بېلابېل حیوانات او نباتات په کې ځای شوي دي؛ دلته تاسو د شاپر لرونکي نهنګ له اسکلیټه او مرجاني کاڼو هم لیدنه کولای شئ.
په ساینس مرکز کې د (ساینس ارکیډ) په نوم کلاسیک نندارتون په ۱۹۶۹ کال کې له افتتاح وروسته د لیدونکو د پام وړ مرکز دی.
تاسې کولای شئ په دغه نندارتون کې د انجنیرۍ او فزیک علومو اړوند له ۶۰ ډېرو د برېښنا، مقناطیسي قوې، اواز، روښنايي او خوځښت له تجربو خوند واخلئ.
دلته تاسې په ژوندۍ بڼه نندارې هم کتلای شئ، لکه د ویښتانو د پورته درېدو تجربه؛ په دې تجربه کې به تاسو وګورئ چې د برېښنا یوه ساکنه قوه څرنګه ستاسو ویښتان پورته دروي.
د «ویسټن» کورنۍ ابتکاراتو مرکز تاسو دې ته هڅوي څو په خپله تجربې وکړئ او یا د ساینس او ټکنالوجۍ د تجربو او ابتکاراتو برخه کې له نورو کسانو سره په عملي بڼه برخه واخلئ.
دغه راز دلته تاسو کولای شئ په بېلابېلو فعالیتونو کې برخه واخلئ، لکه له کاغذ څخه د څیزونو جوړول، د روباټونو ډیزاینول، د معماګانو حلول او داسې نور.
په دغه نندارتون کې کولای شئ ډیجیټلي کامرې، مایکروفونونه، شنې پردې یا سکرینونه وکاروئ او یا یې په اړه خپل نظریات له نورو سره شریک کړئ.
خوځنده ډایناسوران
له هغه نندارتونه لیدنه وکړئ چې تاسو د ډایناسورانو مجسمې په کې د روباټونو، گېرونو او میخانیکي وسایلو په مرسته په حرکت کې لیدلای شئ.
د داسې یوې نړۍ لیدلو او د هغې په اړه پلټنو لپاره چمتو شئ چې مهارت په کې له پوهې او نوښت سره ملتیا کوي! دغه نندارتون په حقیقت کې له فلزاتو د جوړ شوو ډایناسورانو یوه ټولکه ده چې د هغو له حقیقي فوسیلونو په الهام جوړ شوي دي.
یاد ډایناسوران د کنترولېدونکو او چورلېدونکو وسایلو په مرسته حرکت کوي؛ په داسې حال کې چې له دغو خوځښتونو او جسمونو د ساینس برخه کې هم زدهکړه کېدای شي.
دغه راز تاسې به د ډیناسورانو د زمانې په اړه نور معلومات هم ترلاسه کړئ، هغه مهال په نړۍ کې د انکیلو ساروس، ډیپلوموکس او سټروټیو میموس په نومونو ډیناسوران ژوند کاوه.
هیله ده د «انټاریو ساینسي مرکز» له لیدو مو خوند اخیستی وي او د ساینسي علومو او ټکنالوجۍ په اړه مو په زړهپورې شیان زدهکړي وي.
دغه ساینسي مرکز هغه ځای دی چې د یوې پلټنې په اړه پوښتنې راولاړوي او دې ته مو اړ باسي څو هره ورځ د یوه ساینسپوه په ډول فکر وکړئ.
پروا نه لري که تاسې زاړه یاست یا واړه، کنجکاوه یاست یا نوښتګر، د انټاریو د ساینس مرکز د هر چا لپاره یو څه لري؛ راشئ او ژر تر ژره له دغه مرکزه لیدنه وکړئ؛ په ټورنټو ښار کې دغه ساینسي مرکز ستاسو لپاره یو له غوره جاذبو دی.
Views: 14
