ډېر به مو اورېدلي وي چې افغانستان له جیو ستراتیژیک او جیو ایکانومیک اړخه د نړۍ په یوه مهمه سیمه کې موقعیت لري؛ ډېرو سیمهییزو او نړۍوالو زبرځواکونو ته اهمیت لري، ځیني یې د اسیا زړه بولي، ځیني یې د منځنۍ او سوېلي اسیا ترمنځ پل ګڼي او ځیني یې لکه پاکستان او هند د منځنۍ اسیا سرشاره منابعو ته د سوېلي اسیا دروازه بولي.
په واشنګټن کې د ولسمشر ټرمپ له نظره، د امریکا لپاره د چین د څار تر ډېرو نږدې پرته جیو ستراتیژیکه نقطه ده خو ښکاري چې د څلورو اټومي قدرتونو ترمنځ پرتو افغانانو له دغه سیمهییز موقعیته تر اوسه هیڅ ګټه نه ده پورته کړې.
په سیمه کې ډېر هېوادونه د افغانستان په بېثباتۍ کې خپلې ګټې ویني؛ ځینو یې اوبو ته وازه خوله نیولې چې په جنګونو کې راګیر افغانستان به ونه توانېږي د هغوی پر ورخه وړیا ورسپرې اوبه راکابو کړي.
ځینې یې پر تاریخ پنسلونه را کشوي او ځیني نور وېریږي چې که افغانستان ثبات ته ورسېږي، لرغونی برم به یې بېرته راژوندی او د هغوی تر ګونډو لاندې خپلې پخوانۍ ځمکې به ترې بېرته خپلې کړي.
خو په ډیپلوماټیکو دریځونو ولاړ سیاستوال تل د افغانستان ثبات د سیمې ثبات ګڼي او د سیمې بېثباتي په افغانستان پورې تړي.
خو پوښته دا ده سیمهییز ثبات د افغانستان لپاره څومره اهمیت لري؟ ایا د افغانستان ثبات په رښتیا هم د سیمې لپاره مهم دی؟ ایا د سیمې هېوادونه په افغانستان کې ثبات غواړي؟ افغانستان د خپلو ملي ګټو لپاره څه ډول سیمې ته اړتیا لري؟ یوې سولهییزې او پرمختللې او که په بحران کې ښکېلې او په سترو قدرتونو پورې تړلې سیمې ته؟
نن مو په دغه پروګرام کې پر دې موضوع د پوهنتون له استاد او شنونکي ډاکټر سردارمحمد رحیمي سره بحث کړی چې ستاسو پام ورته را اړوو.
Views: 9
