د کاناډا لومړي وزیر مارک کارني د چین په څلور ورځني سفر کې له چین سره د تعرفو کمولو، انرژۍ او سوداګرۍ په برخو کې نوې هوکړې کړې دي.
دا سفر چې نن جمعه پای ته ورسېد، کارني د چین له ولسمشر شي جینپینګ او یو شمېر نورو لوړپوړو چارواکو سره ولیدل.
په دغو ناستو کې د دواړو هېوادونو د اړیکو د بیا احیا په اړه خبرې وشوې.
دغه لیدنې له څو اړخیزو تفاهمونو سره مل وې. په کې د تعرفو کمول، انرژي او سوداګري شامل دي.
دا له ۲۰۱۷ کال راهیسې بیجینګ ته د کاناډا د یوه لومړي وزیر لومړنی سفر بلل کېږي.
کارني ویلي، کاناډا غواړي له چین سره اړیکې بېرته تنظیم کړي.
هغه ټینګار کړی چې دا اړیکې باید ستراتیژیکې، عملي او قاطعې وي، څو د دواړو ملتونو د خلکو په ګټه تمامې شي.
کارني وویل: «موږ له چین سره نوې ستراتیژیکه ملګرتیا رامنځته کوو. تمرکز یې پر سوداګرۍ، انرژۍ، کرنې او نورو مهمو برخو دی.»
د چین او کاناډا د تعرفو کمول
د سفر پر مهال دواړو هېوادونو هوکړه وکړه، چې کاناډا ته د چینایي برقي موټرو پر وارداتو تعرفې به په ترجیحي کچه راکمېږي.
چین هم ژمنه کړې چې د کاناډا پر ځینو کرنیزو محصولاتو لګېدونکې تعرفې به کموي.
کارني وویل: «موږ سوداګریز خنډونه لرې کوو، څو د کاناډا لپاره نوي فرصتونه جوړ شي.»
کارني تمه ښودلې چې د مارچ تر لومړۍ نېټې چین د کاناډا پر کانولا (Canola) لګېدونکې تعرفه له ۸۴ سلنې څخه شاوخوا ۱۵ سلنې ته راکمه کړي.
چین دا مهال پر کانولا زراغتي محصول درنې تعرفې لګولې دي. دغو تعرفو کاناډایي کروندګرو ته لوی اقتصادي زیان اړولی دی.
د انرژۍ د همکارۍ هوکړه
د سفر تر ټولو مهمه پایله د انرژۍ په برخه کې د همکارۍ یو تفاهملیک بلل شوی دی.
دغه تفاهملیک د کاناډا د انرژۍ او طبیعي سرچینو وزیر لاسلیک کړی.
دواړو لورو هوکړه کړې چې د پاکې انرژۍ او د تېلو او ګازو د پراختیا په تړاو تخنیکي خبرې او همغږي روانه وساتي.
د سوداګرۍ او اقتصاد لپاره نوې تګلاره
د انرژۍ تر څنګ، کاناډا او چین د اقتصادي همکارۍ پر یوې نوې کاري تګلارې هم هوکړه کړې ده.
د دې پلان موخه دا ده چې سوداګري باثباته شي، نوې بازارونه پیدا شي او د خصوصي سکتور د پانګونې فرصتونه زیات شي.
په دې چوکاټ کې د کاناډا د کورنیو حیواناتو د خوراک صادرات، د ګرځندوی وده، د خلکو ترمنځ اړیکې او د نړیوالو جرمونو پر ضد ګډ کار هم شامل دي.
کارني ویلي: «موږ بیجینګ ته د نوې ملګرتیا لپاره راغلي یو. له ځان سره به د سوداګرۍ نوې لارې او د صادراتو لوی بازارونه بېرته یوسو.»
Views: 1
