د ملي محور له لوري د کاناډا په ټورنټو ښار کې د افغانستان د روان وضعیت په تړاو د افغانانو غونډه د «ملي مرکه: د ملي یووالي، سولې او پرمختګ لار» تر عنوان لاندې جوړه شوه.
په دې ناسته کې لسګونه افغان شخصیتونه، پوهان او فعالان ګډون درلود. ناسته د ښځو او ځوانانو له فعال حضور سره د افغانستان د روانو ننګونو د ارزونې او د عملي حللارو د وړاندې کولو په موخه جوړه شوې وه.
ګډونوالو په ټینګار سره غوښتنه وکړه چې د افغانانو لپاره دې د یوې نړیوالې لویې جرګې د جوړېدو چمتووالی ونیول شي، د اتباعو له اساسي حقونو په ځانګړي ډول د نجونو د زدهکړې له حق څخه دې سرغړونه ژر تر ژره پای ومومي.
د مرکې اصلي موخه د افغانستان سیاسي، تعلیمي او فرهنګي ستونزې په ګوته کول او د هغو د حل لارې موندل وو. ګډونوالو د اووه تخصصي ډلو په چوکاټ کې د سیاسي، امنیتي، اقتصادي، تعلیمي، ټولنیزو او بشري حقونو په موضوعاتو بحثونه وکړل.
د دغو بحثونو پایلې ښيي چې د ګډونوالو ګډه غوښتنه د یوه مشروع نظام رامنځته کول، د اتباعو د اساسي حقونو په ځانګړي ډول د ښځو د حقونو رعایت، د رواني امنیت ښه والی، پر اقتصادي بنسټونو پانګونه او د زدهکړې چاپېریال په ځانګړي ډول د نجونو لپاره بېرته احیا کول دي.
د ناستې په پای کې ګډونوالو ټینګار وکړ چې دا ډول ملي مرکې باید دوام ومومي، تر څو افغانان وکولای شي د خپل هېواد د راتلونکي لپاره واضح نظریات او عملي حللارې وړاندې کړي. ملي محور هم اعلان وکړ چې دا ډول ناستې په نورو هېوادونو کې هم ترسره شوې دي او هڅه کوي دا پروسه هغو هېوادونو ته هم وغځوي چې تر اوسه په کې دا ډول ناستې نه دي شوې.
ملي محور هڅه کوي چې د افغانانو نظریات او حللارې راټولې کړي، او په پای کې دا ملي مرکه په یوه لویه جرګه بدله کړي؛ داسې جرګه چې د افغانستان او افغانانو راتلونکی په شفاف ډول ترسیم کړي.
Views: 4
