۱۴۰۲/۴/۱۱
نږدې دوه کاله کېږي چې د طالبانو له واکمنۍ سره د نجونو ښوونځي تړل شوي دي او د ولس، ديني عالمانو، قومي مشرانو، مدني ټولنې او نړيوالې ټولنې له پرله پسې غوښتنو سره نه يوازې د ښوونځيو تړلې دروازې خلاصې نه شوې، بلکې د پوهنتونو دروازې هم بندې شوې او ولسي غوښتنې او اعتراضونه وځپل شول. سره له دې چې ځينې چارواکي دا بنديزونه مؤقت ګڼي او د نوې طرحې، نوي نصاب او مناسبو شرايطو خبره کوي، خو لاهم د رڼا هېڅ څرک نه ليدل کېږي.
څرنګه چې د علم زده کړه هم ديني فريضه ده، هم يو بنسټيز بشري حق دی، هم د ولس غوښتنه ده او هم د يوه هېواد د خپلواکۍ، ثبات، ځان بسياينې او سوکالۍ مهم شرط دی، نو د نجونو د زده کړو پر وړاندې بنديزونه نور د منلو او زغملو نه دي. په همدې دليل ګڼ شمېر افغان پوهانو، ديني عالمانو، ملي او ټولنيزو شخصيتونو پرېکړه کړې چې د خپلو لوڼو د روا او بنسټيز حق لپاره به يو پراخ ملي او ولسي کمپاين پيلوي. دا کمپاين يو غيرسياسي، سوله ييز ولسي خوځښت دی او اصلي غوښتنه مو همدا ده، چې د نجونو پر وړاندې د زده کړو دروازې پرانيستل شي. هغه دلايل چې د بنديزونو د توجيه لپاره راوړل کېږي، نه يوازې د ولس لپاره د قناعت وړ ندي، بلکې پخپله چارواکي يې هم پر نيمګړتيا باندې پوهېږي.
د چارواکو متضادو دلايلو ته په کتو سره موږ اندېښمن يو، چې:
آيا دوی د زده کړو په اړه د اسلامي احکامو په اړه شک لري؟
آيا دوی د طرحې په جوړولو نه پوهېږي؟
آيا دوی د خپلو لوڼو د امنيت ساتلو توان نه لري؟
آيا دوی د نصاب په پلمه د هلکانو لپاره يو ډول اسلامي اصول او نجونو لپاره بل ډول اسلامي اصول غواړي؟
آيا دوی د هغه جاهلي فرهنګ ملاتړ کوي، چې له اسلامي احکامو او بشري حقونو سره څرګند تضاد لري؟
آيا دوی د خپلو بچيانو پر بنيادي حقونو سياسي معامله کوي؟
او که آيا دوی د خپلو پرېکړو واک نه لري او دا پرېکړې د نورو له خوا ورباندې تپل کېږي؟
که دا اندېښنې سمې نه وي، نو زموږ غوښتنه دا ده چې چارواکي دې ژر تر ژره د ولس غوښتنو ته غاړه کېږدي او نور دې د ولس او هېواد له راتلونکي سره بې پروايي نه کوي. دوی بايد پدې خبره پوه شي، چې د نجونو زده کړې د ملت لپاره سره کرښه ده او له دې کرښې اوښتل له ملت سره د تقابل په معنا ده او دا تقابل نه د واکمن نظام په ګټه ده او نه د هېواد په ګټه.
دوه کاله انتظار او حوصله ډېر وخت دی، خو پداسې مهمه ملي مسئاله کې نور انتظار ملي ګټې له خطر سره مخامخ کوي. د نجونو زده کړه يو داسې حق دی چې ټوله نړۍ يې په رسميت پېژني او دا د ملت مکلفيت دی چې د خپلو لوڼو حق که د هر چا له خوا ضايع شوی وي، ترې واخلي. موږ پر ټول ولس غږ کوو چې سر له همدې شېبې ژمنه وکړي چې د خپلو لوڼو د زده کړو حق د زامنو په شان وغواړي. له حاکم نظام او نړیوالې ټولنې څخه خپلو مشروع، سوله يیزو او مدني غوښتنو ته دوام ورکړي. د ښې همغږۍ او انسجام لپاره موږ له ولس غوښتنه کوو، چې د نجونو د زده کړو له ملي کمپاين سره مل شي او دا ملي داعيه راسره بدرګه کړي. که چېرې ولس همغږی شي، موږ باور لرو چې هېڅوک يې حق نه شي خوړلی.
موږ د اسلامي هېوادونو پر سازمان او د اسلامي نړۍ پر جيدو ديني عالمانو غږ کوو، چې ژر تر ژره د افغانستان اوسنيو واکمنانو ته قناعت ورکړي، چې له زده کړو څخه د نجونو محرومول نه يوازې د اسلامي امت په خير نه دي، بلکې د نړۍ په کچه د اسلام په اړه يو ناسم تصوير او پوهاوی رامنځته کوي.
موږ له نړيوالي ټولني څخه هم غواړو چې د نجونو له تعلیم څخه ملاتړ ته دوام ورکړي او پر داسې لارو چارو فکر او اقدام وکړي، چې د افغانستان ملي ګټې او ولس پکې زيانمن نه شي، خو چارواکي دېته قانع او يا اړ شي چې د نجونو پر مخ د زده کړو تړلې دروازې بېرته پرانيزي.
موږ پدې توګه د نجونو د زده کړو ملي کمپاين پيلوو او په راتلونکو اعلاميو او ليکونو کې به د ولس غوښتنې او اندېښنې په مشخص ډول مطرح کوو.
په دې هيله چې د نجونو پر مخ د زده کړو دروازې ژر تر ژره پرانيستل شي، زموږ لوڼې او خويندې نور له ناهيلۍ او رواني رنځ څخه ونه ځورېږي او هېوادوال مو د خپلو لوڼو د تعليم لپاره د مهاجرت کړاوونه ونه ګالي.
و ما علينا الا البلاغ المبين
Views: 73
