پېژندنه:
کاناډا یو له هغه هېوادونو څخه دی چې د ژوند کولو لوړ کيفيت او پياوړی اقتصاد لري او ورسره په څنګ د مختلفو کلتورنو د هستوګنې ټاټوبی هم دی او د هغو کډوالو لپاره چې د ښکلي او سوکاله ژوند په لټه کې دي، يو له غوره هېوادونو دی. د کاناډا تابعيت ترلاسه کول د کډوالو لویه هيله او موخه ده؛ د کاناډا تابعيت په اخیستو سره دوی د رايې ورکولو، کاناډايي پاسپورټ ترلاسه کولو او له نورو دولتي خدمتونو برخمن کېږي. په دې ليکنه کې پر شرایطو او معيارونو برابرو کسانو لپاره د غوښتنليکونو پروسو، اړينو ټيسټونو او نورو لازمي پروسو په ګډون د کاناډا تابعيت ترلاسه کولو په پار شرایط او مېتودونه وړاندې کېږي.
د کاناډا د تابعيت اهميت:
د کاناډا تابعیت د کډوالو په ژوند او د کاناډا په پراخه ټولنه کې لوی اهمیت لري؛ لاندې ټکي د کاناډا تابعیت اهمیت په ګوته کوي:
حقونه او امتیازات: د کاناډا اتباع له ډېرو حقونو او امتیازاتو ګټه اخلي؛ لکه په فدرالي، ولايتي او ښاروالۍ ټاکنو کې د رایې ورکولو حق، د عامه دفتر لپاره د کاندیدېدو حق او د کاناډا پاسپورټ لپاره د غوښتنلیک حق؛ دا حقونه اتباعو ته توانايي ورکوي چې په ډیموکراتیک بهیر کې په بشپړه توګه برخه واخلي او د کاناډايي ټولنې په پراختیا کې مرسته وکړي.
دولتي خدماتو ته لاسرسی: اتباع د ځانګړو دولتي مزایاوو او خدماتو مستحق دي، لکه د کار بېمه، د زاړه عمر امنیت او د ماشومانو لپاره ګټې. دا ګټې د اتباعو او د هغوی کورنیو لپاره د ژوند کیفیت په ښه کولو کې مرسته کوي.
نورو هېوادونو ته سفرونه: د کاناډا پاسپورټ اتباعو ته اجازه ورکوي چې ډیری هېوادونو ته پرته له ویزې سفر وکړي او نړۍوال سفرونه ورسره ډېر اسانېږي. سربېره پر دې، د کاناډا اتباع حق لري چې د بېړني حالت یا نورو مسئلو په صورت کې په بهر کې د کاناډا له سفارتونو او قونسلګریو مرسته وغواړي؛ د کاناډا اتباع ټولو طبي خدمتونو ته لاسرسی لري، په دې کې په روغتون کې د پاتې کېدو پوښښ، د نسخې درمل او نور ډېر څه شامل دي.
د زدهکوونکو پورونه: هغه زدهکوونکي چې په کاناډا کې زدهکړه کوي، له مختلفو بانکونو او پور ورکوونکو د پور اخیستو وړ ګرځي او دا پورونه کولای شي د کتابونو، زدهکړې فیسونو او نورو لګښتونو پوښلو کې مرسته وکړي.
د تړاو احساس: د کاناډا تابعیت ترلاسه کول له کاناډا سره د تړاو او تعلق احساس رامنځته کوي؛ په دې توګه دغه هېواد او ارزښتونو ته يې ژمنتيا زياتېږي. د تړاو دغه احساس کولی شي له مهاجرینو سره مرسته وکړي چې په کاناډا کې په اغېزناکه توګه مدغم شي او په ټولنیز اتحاد کې مرسته وکړي.
کلتوري تنوع:
کاناډا د هغو هېوادونو په ډله کې راځي چې خورا ډېره کلتوري تنوع لري او په عين حال کې مختلفو کلتورونو ته په ارزښت ورکولو کې هم شهرت لري. د مهاجرینو په منلو او تابعیت لارو چارو په چمتو کولو سره کاناډا یوه متنوع ټولنه رامنځته کوي چې کلتوري اړخ ورسره بډایه کېږي او ټولنیزې همغږۍ ته وده ورکول کېږي.
په اقتصادي پراختیا کې ونډه: د کاناډا اتباع اکثره د کار، تشبث او پانګونې له لارې د هېواد اقتصادي پراختیا کې د پام وړ مرسته کوي؛ مستحقو کډوالو ته د تابعیت په ورکولو سره، کاناډا د هغوی له مهارتونو، وړتیاوو او سرچینو ګټه پورته کوي او په دې توګه په هېواد کې اقتصادي وده او سوکالي رامنځته کېږي.
نړیوال شهرت: کاناډا له دې کبله چې ټولشموله دولت لري او د کډوالو لپاره يې غېږه پرانيستې ساتلې، نړۍوال مثبت شهرت لري؛ دغه شهرت د نړۍ له ګوټ ګوټ څخه د لوړ مهارت لرونکي کارګرانو، متشبثینو او پانګوالو جذبولو کې مرسته کوي او په دې توګه د کاناډا اقتصاد او ټولنه لا نوره هم پیاوړې کوي.
د کاناډا تابعیت لپاره چمتووالی:
د کاناډا تابعیت اهمیت او ګټو ته په پام، د غوښتونکو لپاره خورا مهمه ده چې د غوښتنلیک پروسې لپاره بشپړ چمتووالی ونیسي.
دلته د راتلونکو اتباعو لپاره ځینې لارښوونې دي:
رسمي لارښود لوستل: د “Discover Canada: The Rights and Responsibilities of Citizenship,” تر سرليک لاندې رسمي مطالعې لارښود د هغو غوښتونکو لپاره ارزښتناکه سرچینه ده چې د تابعیت ازموینې لپاره چمتووالی نيسي؛ په دې کې دکاناډا تاریخ، جغرافیې، حکومت او کلتور په ګډون موضوعات راوړل شوي چې غوښتونکي یا متقاضیان یې باید دقیق ولولي.
تمریني ازموینې اخیستل: ډېرې انلاین سرچینې شته چې په کې د تابعیت تمريني ازموینه ورکول کېږي؛ دغه ډول تمريني ازموينې له غوښتونکو سره مرسته کوي چې د دوی پوهه اندازه کړي او هغه ساحې وپېژني چې دوی ورته اړتیا لري. منظم تمرین کولی شي د باور په رامنځته کولو کې مرسته وکړي او ډاډ ترلاسه کړي چې غوښتونکی د اصلي ازموینې لپاره ښه چمتو شوی دی.
ژبني مهارتونو ته وده ورکول: غوښتونکو لپاره چې د انګلیسي یا فرانسوي ژبو مهارتونو ته باید ورکړي، د ژبې په ټولګیو کې نوم لیکنه، د ژبې د تبادلې پروګرامونو کې برخه اخیستل او د اصلي ویناوالو سره تمرین کول خورا ګټور دي. سربیره پردې، فلمونو لیدل، کتابونو لوستل او په ټاکل شوې ژبه کې د پوډکاسټونو اوریدل کولی شي ډېر مرستندوی تمام شي.
قانوني مشورې غوښتل: که چیرې یو غوښتونکی د تابعیت غوښتنلیک پروسې د کوم اړخ په اړه ډاډه نه وي، ښه به وي چې د مهاجرت وکیل یا د کاناډا د کډوالۍ د تنظیم شوي سلاکار سره مشوره وکړي.
ټولنیزو ګروپونو سره یوځای کېدل: د ټولنیزو ګروپونو، داوطلبو ادارو او ټولنیزو کلبونو له لارې له نورو کډوالو او کاناډايي اتباعو سره په اړيکه کېدل د تابعيت پروسې پر مهال زيات ګټور ثابتېږي؛ دا ډول اړیکې له غوښتونکو سره مرسته کوي چې د کاناډا کلتور او ارزښتونو په اړه نور معلومات پیدا کړي او د تابعیت له ترلاسه کولو وروسته به د کاناډا په ټولنه کې ادغام ورته اسانه وي.
په شرایطو برابرو اشخاصو معیارونه:
د دې لپاره چې غوښتونکي د کاناډا تابعيت لپاره مستحق و اوسي، د ځینو شرایطو پوره کول ورته لازمي دي؛ دغه شرایط پر پنځو کټګوريو باندې وېشل شوي دي: د دايمي هستوګنې وضعيت، د هستوګنې شرایط، د ژبې مهارت، د کاناډا په اړه معلومات درلودل او ښه اخلاق.
۱- د دايمي هستوګنې وضعيت:
غوښتونکي بايد په کاناډا کې د دايمي هستوګنې تقاضا ولري؛ په دایمي هستوګنې سره په دغه هېواد کې د ژوند کولو او کار په برخو کې نامحدود حقوق ورکول کېږي؛ د دايمي هستوګنې د شرایطو په رعايتولو سره هغوی د دايمي هستوګنې حق خوندي ساتلی شي.
۲- د هستوګنې شرایط:
غوښتونکي بايد د غوښتنليک له وړاندې کولو مخکې د پنځو کلونو په جريان کې په کاناډا کې لږ تر لږه درې کلونه (۱۰۹۵ ورځې) وخت تېر کړی وي؛ د موقتي هستوګن کوونکو (ګرځندویانو، زده کړیالانو او کارګرانو) لپاره نيمې ورځې په نظر کې نيول کېږي. دغه راز څومره چې یو کس ډېر سفرونه ولري، د هغو د تابعیت پروسه اوږدېږي؛ ځکه د کاناډا استخبارات له هغو هېوادونو څخه د شخص په اړه معلومات راټولوي، له همدې امله دغه کار ډېر وخت نیسي.
۳- ژبنی مهارت:
هغه متقاضیان چې عمر يې له ۱۸ څخه تر ۵۴ کلونو پورې وي، بايد د کاناډا پر يوې رسمي ژبې انګليسي يا فرانسوي برلاسی ولري. په دې برخه کې ارزونه له مختلفو لارو ترسره کېدلی شي، لکه د يوه پېژندل شوي ازمايښت د پایلو وړاندې کول، د داسې يوه تحصيلي مدرک وړاندې کول چې په انګليسي يا فرانسوي ژبه کې په منځنۍ يا له منځنۍ کچې وروسته ترسره شوي وي او يا هم له اړوند مامور سره د انټرويو (مرکې) پر مهال د ژبنيو مهارتونو په ډاګه کول. دا هغه لارې چارې دي چې د ژبني مهارت لرلو تصديق پرې ترسره کېږي.
۴- د کاناډا په اړه پوهېدل:
هغه متقاضیان چې عمر يې له ۱۸ څخه تر ۵۴ کلونو پورې وي، بايد د کاناډا د تاريخ، ارزښتونو، بنسټونو او سمبولونو او د ښاريتوب حقونو او مسئووليتونو برخو کې پوهه ولري. دغه پروسه د څو ځوابه پوښتنو د ازموينې په پایله کې بشپړېږي، کوم چې د کاناډا د کډوالۍ، کډوالو او تابعيت ورکولو ادارې (IRCC) له لوري د يوه متني لارښود په توګه غوښتونکو ته ورکول کېږي.
۵- ښه اخلاق:
متقاضیان بايد جرمي سابقه ونه لري، نه هم په کوم جرم تورن پېژندل شوي وي او نه يې هم د اخراج امر صادر شوی وي. د دې ترڅنګ غوښتونکی بايد په تېرو پنځو کلونو کې د کاناډا د تابعيت ادارې له لوري د ناسمو معلوماتو وړاندې کولو او يا هم د جعل له امله له تابعيت غوښتنې څخه محروم شوي نه وي.
له ۱۸ کلنۍ څخه د کمعمره ماشومانو پروسیجر:
هغه ماشومان چې په کاناډا کې زېږیدلي، په اتوماتيک ډول د کاناډا تابعیت ترلاسه کوي. له اتلس کلنۍ څخه د کم عمره ماشومانو مور یا پلار چې په کاناډا کې نه وي زېږیدلي، مګر اوس د کاناډا تابعیت لري، ممکن د تابعیت لپاره وړ وي؛ که چېرې د دوی مور او پلار دواړه د کاناډا اتباع وي او د وړتیا نور شرایط پوره کړي، خو که مور او پلار یې د کاناډا تبعه نه وي نو نشي کولای چې د کاناډا تبعه شي. له اتلسو کلنۍ څخه د کم عمره ماشومانو مور، پلار یا قانوني سرپرست کولای شي، د ماشومانو په استازیتوب د تابعیت غوښتنه وکړي.
له ۵۴ کلنۍ څخه د لوړ عمر لرونکو کسانو لپاره پروسیجر:
د لوړ عمر کسانو د تابعیت پروسه د ځوانو غوښتونکو له پروسې سره تر ډېر ورتهوالی لري، خو ځیني توپیرونه پکې شته. تر ټولو مهمه یې دا چې له ۵۵ کلنۍ لوړ عمرلرونکو کسانو لپاره د ژبي زدهکړه معاف شوې، خو بیا هم اړینه ده څو د تابعیت نور شرایط پوره کړي. دوی باید په کاناډا کې د اوسېدو اراده ولري، په کاناډا یا کوم بل بهرني هېواد کې جرمي سابقه ونلري او د پنځو کلونو په جریان کې یې باید لږ تر لږه درې کاله په کاناډا کې ژوند کړی وي او پر دې سربېره باید پورته ذکر شوي اړین شرایط پوره کړي.
د غوښتنليک پروسه:
د کاناډا تابعیت لپاره د غوښتنلیک پروسه څو پړاوونه لري چې په لاندې ډول تشريح کېږي:
د تابعيت غوښتنې پکېج ترلاسه کول: غوښتونکي له IRCC ويبپاڼې څخه د غوښتنليک پکېج ډاونلوډ کولی شي. په دې پکېج کې د غوښتنليک فورم، د اسنادو چکلېست او لارښود شامل دي چې د غوښتنليک په بشپړولو کې مرسته کولی شي.
د IRCC ويبپاڼې د تابعیت غوښتنلیک لینک:
My immigration or citizenship application – Canada.ca
د حمايوي اسنادو راغونډول: متقاضیان بايد بېلابېل حمايوي اسناد لکه، د دايمي استوګنې وضيعت ثبوت، د پاسپورټونو يا سفر اسنادو کاپيانې، د ژبني مهارت ثبوت، دوه قطعې عکسونه او نور هغه اسناد چمتو کړي چې په په چکلېست کې مشخص شوي وي.
د غوښتنليک فورم بشپړول: غوښتونکي باید د غوښتنلیک فورمه ډکه او ډاډ ترلاسه کړي چې ټول معلومات دقیق او بشپړ دي. مهمه ده چې ټولو پوښتنو ته په ریښتیني ډول ځواب ووایاست او ټول اړین معلومات چمتو کړئ، که چېرې د دقیقو او سمو معلوماتو په وړاندې کولو کې پاتې راشئ، د غوښتنليک د ځنډېدلو يا مستردېدلو لامل کېدای شي.
د غوښتنلیک فیس تادیه کول: متقاضیان باید فیس په داسې ډول تاديه کړي چې د بېرته ګرځېدو وړ نه وي. دغه فیس د IRCC ویبپاڼې له لارې انلاین تادیه کېږي. د لویانو لپاره د غوښتنلیک فیس ۶۳۰ کاناډایي ډالر او د کوچنيانو فیس ۱۰۰ کاناډایي ډالر دی.
د فیس د انلاین تادیې لینک:
غوښتنليک سپارل: کله چې د غوښتنلیک فورمه بشپړه او ټول حمایوي اسناد راټول شي، متقاضیان باید د خپل غوښتنلیک پکېج اړوند پروسس مرکز ته ولېږي.
د تابعیت په ازموینې او مرکې کې ګډون: وروسته له دې چې د غوښتنلیک بیاکتنه وشي، له ۱۸ څخه تر ۵۴ کلونو پورې مستحقو کسانو ته به د تابعیت ازموینې لپاره بلنه ورکړل شي. دا ازموینه د رسمي مطالعې لارښود پر اساس ۲۰ څو ځوابه پوښتنې لري او متقاضیان د بریالي کېدو لپاره باید له ۲۰ نومرو څخه لږ تر لږه ۱۵ نومرې ترلاسه کړي. له دې ازموينې څخه وروسته متقاضي ښايي له اړوند مامور سره يوې انټرويو ته هم حاضر شي، څو د ژبني مهارت او د کاناډا په اړه يې د پوهې لرلو ارزونه وشي. مامور ښايي ځينې نورې پوښتنې هم وکړي، تر څو په غوښتنليک کې ورکړل شوي معلومات تصديق کړي.
د پرېکړې ترلاسه کول: کله چې د غوښتنلیک بیاکتنه وشي او ازموینه او مرکه بشپړه شي، IRCC به د غوښتنلیک په اړه پریکړه وکړي. که غوښتنلیک تصویب شي، متقاضي به د تابعیت په مراسمو کې د ګډون لپاره خبرتیا ترلاسه کړي. که غوښتنلیک رد شي، متقاضي به یو لیک ترلاسه کړي چې د رد دلیلونه او د پرېکړې د استیناف څرنګوالي په اړه به معلومات بیانوي.
د تابعیت په مراسمو کې ګډون کول: منل شوي غوښتونکي باید د تابعیت په مراسمو کې برخه واخلي، هلته به دوی د تابعیت لوړه کوي او د کاناډا تابعیت سند به ترلاسه کوي. د تابعیت مراسم یوه مهمه پروسه ده، ځکه چې دا د تابعیت پروسې پای او د کاناډا د رسمي وګړي په توګه د نوي ژوند پیل دی.
ننګونې او اړين ټکي:
د کاناډا د تابعيت ترلاسه کولو پروسه که څه هم منظمه ده، خو له ننګونو خالي نه ده. غوښتونکی باید لاندې ځيني اړين ټکي په پام کې ولري:
پروسس وختونه: د تابعیت غوښتنلیکونه د پروسس لپاره څو میاشتې یا حتی کلونه وخت نیسي. دغه وخت په مختلفو فکټورونو، لکه د غوښتونکي اصلي هېواد، د غوښتنلیک پېچلتیا او د پروسس کېدونکو غوښتنلیکونو حجم پورې اړه لري. غوښتونکي باید د احتمالي اوږد انتظار لپاره چمتو وي او دوی باید په دې وخت کې د خپلې دايمي استوګنې حالت برقرار وساتي.
اسناد: د مهمو حمايوي اسنادو راټولول ډېر وخت نیسي او هم يوه ننګوونکې پروسه ده، په ځانګړې توګه د هغه غوښتونکي لپاره دا يوه ننګوونکې پروسه ده چې د کډوالۍ پیچلې تاریخچه ولري. مهمه ده چې دقیق او بشپړ اسناد چمتو شي، څو له ځنډ یا انکار څخه مخنیوی وشي.
ژبنی مهارت: هغه متقاضیان چې په انګلیسي یا فرانسوي کې مهارت نه لري، ښايي د ژبې او تابعيت په ازموينو او همدارنګه د IRCC له مامور سره په مفاهمه کې له ستونزو سره مخ شي. مهمه ده چې د انګليسي يا فرانسوي ژبې د پياوړې کولو لپاره کافي وخت او انرژي وکارول شي، څو د بریالي تابعیت غوښتنلیک امکانات زیات شي.
د کاناډا په اړه پوهه: متقاضیان باید د کاناډا د تاریخ، ارزښتونو، بنسټونو او سمبولونو په اړه ښه پوهه ولري، څو د تابعیت په ازموینه کې بريالي شي. د رسمي مطالعې لارښود او نورو سرچینو مطالعه کولی شي چې له متقاضیانو سره مرسته وکړي څو د ازموینې ښه ترسره کولو لپاره اړینه پوهه او باور ترلاسه کړي.
مالي مسله: د کاناډا تابعیت لپاره غوښتنلیک د پام وړ لګښت لري، په ځانګړې توګه د هغو کورنیو لپاره چې ډېری غړي یې په ورته وخت کې غوښتنه کوي. غوښتونکي باید د غوښتنلیک فیس، ژبنۍ ازموینې او نورو اړوندو لګښتونو په پار بودجه چمتو کړي.
پایله:
د کاناډا تابعيت ترلاسه کول د ډېرو کډوالو يوه لويه هيله ده او د دوی ژوند ورسره بدلیدلی شي. په دې توګه دوی کولی شي چې په کاناډايي ټولنه کې ځان په بشپړه توګه مدغم کړي او د دغه هېواد له غوره خدمتونو او مزاياوو څخه ګټه واخلي. د کاناډا تابعیت ترلاسه کولو شرایطو او میتودونو په پوهېدو سره متقاضیان کولی شي چې د غوښتنلیک پروسه په ښه توګه پرمخ بوځي او د دوی د بریا چانسونه زيات کړي. دا پروسه ممکن ننګوونکې وي او وخت ونیسي، خو د هغو لپاره چې غواړي په کاناډا کې يې راتلونکی ژوند روښانه او ښکلی وي، د دوی هڅې بالاخره يوه عالي پايله ورکوي.
اخځلیکونه:
Government of Canada. (n.d.). Apply for citizenship. Immigration, Refugees and Citizenship Canada.
Government of Canada. (n.d.). Discover Canada: The rights and responsibilities of citizenship. Immigration, Refugees and Citizenship Canada.
Government of Canada. (2019). Canadian Citizenship Act. Justice Laws Website.
Settlement.Org. (n.d.). How can I apply for Canadian citizenship?
Bloemraad, I. (2006). Becoming a citizen in the United States and Canada: Structured mobilization and immigrant political incorporation. Social Forces, 85(2), 667-695.
Omidvar, R., & Richmond, T. (2003). Immigrant settlement and social inclusion in Canada. Laidlaw Foundation.
Reitz, J. G., & Banerjee, R. (2007). Racial inequality, social cohesion and policy issues in Canada. In K. Banting, T. J. Courchene, & F. L. Seidle (Eds.), Belonging? Diversity, recognition and shared citizenship in Canada (pp. 489-545). Institute for Research on Public Policy.
Biles, J., Tolley, E., & Ibrahim, H. (2014). Does Canada have its own model of citizenship and integration? In R. Zapata-Barrero (Ed.), Immigrant incorporation in political parties: Exploring the diversity gap (pp. 39-58). Routledge.
Kymlicka, W. (2012). Multiculturalism: Success, failure, and the future. Migration Policy Institute.
Bloemraad, I. (2004). Who claims dual citizenship? The limits of postnationalism, the possibilities of transnationalism, and the persistence of traditional citizenship. International Migration Review, 38(2), 389-426.
فارسی کاندا دات کام، مهاجرت به کانادا، شرایط تابعیت
ویبسایت موسسه اصطحباناتی، اخذ تابعیت کانادا، شرایط شهر وندی در سال ۲۰۲۳
هلدینګ رهپویان، شهروندی کانادا، انچه در مورد شهروندی کانادا باید بدانید.
ای ویسا ایمیګریشن دات اورگ، شهروندی کانادا، چګونه میتوان برای تابعیت کانادا اقدام کرد؟
آتیه آفرنیان، مقالات، اقامت و تابعیت کشور کانادا.
Views: 599
