په سیاسي چارو کې د ملګرو ملتونو د سرمنشي مرستیالې روزمیري ډیکارلو پر افغانستان د پاکستان د پوځي رژیم برید کې د ملکي وګړو پر مرګژوبلې خواشیني څرکنده کړې او ویلي یې دي چې دغه موضوع به د ملګرو ملتونو له غړو هېوادونو او نورو اړخونو سره راپورته کړي.
د پاکستان پوځي رژیم د تېرې یکشنبې په شپه په پکتیکا کې پر یوه مدرسه او ننګرهار کې پر استوګنیزو سیمو هوايي بریدونه وکړل. د راپورونو له مخې، د دغو بریدونو له امله په ننګرهار کې د ښځو او ماشومانو په ګډون د یوې کورنۍ ۱۳ کسان شهیدان شول او پنځه نور لا هم نادرکه دي.
دغهراز راپورونه ښيي چې په يادو بریدونو کې نهه ملکي کسان ټپیان شوي هم دي.
د بهرنیو چارو وزارت د یوې خبرپاڼې په خپرولو ویلي چې مولوي امیرخان متقي په سیاسي چارو کې د ملګرو ملتونو د سرمنشي له مرستيالې روزميري ډيکارلو سره ټیلېفوني خبرې وکړې.
سرچینې زیاته کړې، په دې ټیلېفوني مکالمه کې د بهرنيو چارو وزير د پاکستان له خوا د وروستیو هوايي بريدونو په هکله چې پهکې ملکي وګړي په نښه شوي، خپله ژوره اندېښنه څرګنده کړه او یاده یې کړه چې د تېرو څلورو کلونو په جريان کې د پاکستان له لوري مکررو بريدونو کې يوازې ملکي وګړي په نښه شوي دي.
خبرپاڼه کې راغلي، په یادو بریدونو کې هیڅکله داسې کوم وسلهوال نه دی وژل شوی چې پاکستانی لوری یې د شتون او په نښه کولو ادعا کوي چې دا پر افغانستان د پاکستان تورونه بېبنسټه ثابتوي.
متقي زیاته کړې چې په افغانستان کې وسلهوالې ډلې شتون نه لري او د کور ډیپلوماتيک په شمول ټول اړخونه کولای شي د وروستي هوايي بريد ځای ته ورشي او وضيعت له نږدې وګوري.
د بهرنیو چارو وزارت لیکلي، روزمیري ډیکارلو په وروستي بريد کې د ملکيانو پر مرګژوبله ژوره غمرازي وښوده ویې ويل چې د پاکستان د هوايي بريدونو موضوع د ملګرو ملتونو له غړو هېوادونو او نورو اړخونو سره راپورته کوي.
خبرپاڼه کې راغلي، په دې مکالمه کې همدارنګه د دوحې د ناستو، کاري ډلو او نورو اړوندو مسایلو په تړاو هم خبرې او وړانديزونه وشول او هيله څرګنده شوه چې له شته پرمختګونو سره سره به ګډو هڅو ته دوام ورکول کېږي چې پرمختګ ته لا لار هواره شي.
Views: 6
