د ننګرهار په بهسودو کې د پاکستان پوځي رژیم د وړمې شپې برید کې پنځه نادرکه شوي کسان لا هم نه دي موندل شوي، دغهراز دوه ماشومان په خوږیاڼو کې په برید کې ټپيان شوي او یو ماشوم په مومندره کې پاکستاني ځواکونو په دهشکه ویشتلی او ټپي شوی دی.
د پاکستان پوځي رژیم وړمه شپه په پکتیکا کې پر یوه مدرسه او ننګرهار کې د استوګنې پر سیمو هوایي بریدونه وکړل. تېره ورځ د ننګرهار د بهسودو په ګردي کڅ سیمه کې د ۱۳ شهیدانو د تدفین مراسم ترسره شول او پنځه نور کسان لا تر اوسه نادرکه دي.
د ننګرهار د امنیې قوماندانۍ خبرپاڼه کې راغلي: «د پاتې پنځو کسانو جسدونه اوس هم نادرکه دي او د هغه ځای خاوره چې جسدونه پهکې نادرکه وو، ټوله بار او بل ځای ته انتقال شوه.»
سرچینه زیاتوي، په دغو بریدونو کې اته نور ملکي وګړي ټپیان شوي دي.
په خبرپاڼه کې راغلي: «د ټپیانو له ډلې پنځه کسان د بهسودو ولسوالۍ، دوه تنه د خوګیاڼو ولسوالۍ او یو ماشوم د مومندرې ولسوالۍ په مربوطاتو کې ټپیان شوي دي. یاد ماشوم هغه مهال چې د څارويو په څرولو بوخت و، د پاکستان د پوځي رژیم له لوري په دهشکه وویشتل شو او ټپي شو.»
امنیې قوماندانۍ لیکلي، د دغو بریدونو ټول قربانیان د ښځو او ماشومانو په ګډون ملکي وګړي دي.
د پوهنې وزارت ویاند، منصور احمد حمزه وایي چې ننګرهار او پکتیکا کې د پاکستان پوځي رژیم د وړمې شپې هوایي بریدونو کې اته زده کوونکي شهیدان شوي او یو بل ټپی دی. د هغه د معلوماتو له مخې، له یادو کسانو د درېیو نجونو په ګډون اووه زده کوونکي په ننګرهار کې شهیدان شوي او یو تن د مدرسې زده کوونکی د پکتیکا په برمل ولسوالۍ کې ټپی شوی دی.
په افغانستان کې د ملګرو ملتونو مرستندوی ماموریت (یوناما)، په داسې حال کې چې وايي، پر افغانستان د پاکستان د وړمې شپې هوایي بریدونو ملکي وګړو ته تلفات اړولي، له دواړو لوریو غواړي چې د ملکي وګړو د خوندیتوب او د لا زیاتې مرګ ژوبلې د مخنیوي لپاره جګړې ته د تل لپاره د پای ټکی کیږدي او د نړیوالو قوانینو له مخې د توپیر، تناسب او احتياط اړین اصول په پام کې ونیسي. د پاکستان پوځي رژیم وړمه شپه په پکتیکا کې پر یوه مدرسه او ننګرهار کې پر استوګنیزو سیمو هوايي بریدونه وکړل. د راپورونو له مخې، د دغو بریدونو له امله ننګرهار کې د ښځو او ماشومانو په ګډون د یوې کورنۍ ۱۳ ملکي کسان شهیدان شوي او پنځه نور لا هم نادرکه دي. دغه راز راپورونه ښيي چې په يادو بریدونو کې نهه ملکي کسان ټپیان شوي هم دي.
Views: 11
