د کاپیسا امنیه قومانداني وايي چې د دغه ولایت د مرکز اړوند په شوخي کلي کې پر یوه کور له غره د ډبرو ښویېدو له امله څلور کسان مړه او شپږ نور ټپیان شوي دي.
د کاپیسا د امنیې قوماندانۍ ویاند عبدالفتاح فایز پژواک ته وویل چې دغه پېښه تېره شپه د دغه ولایت د مرکز اړوند په شوخي کلي کې شوې ده.
هغه زیاته کړه، د غره ښویېدنې له امله پر یوه کور ډبرې راغلې چې له امله یې د یاد کور څلورو کسانو ژوند له لاسه ورکړی او شپږ نور ټپیان شوي دي.
سرچینې د پېښې په اړه نور جزئیات ور نه کړل.
د یادونې ده، د هېواد په یو شمېر غرنیو سیمو کې له دې مخکې هم ورته پېښې رامنځته شوې دي.
Views: 5
