د راپورونو له مخې، د یونان ساحلي ګارډ اعلان کړی چې د اژه سمندر په اوبو کې، د خیوس ټاپو ته نږدې، د کډوالو د یوې کښتۍ او د ساحلي ګارډ د یوې بېړۍ په ټکر کې ۱۴ کډوالو خپل ژوند له لاسه ورکړی.
د رویټرز خبري اژانس د راپور له مخې، د یونان ساحلي ګارډ یوه چارواکي ویلي چې دوی د کډوالو یوه کوچنۍ کښتۍ ولیده چې کډوال په کې سپاره وو او هغوی ته یې امر وکړ چې بېرته وګرځي.
په راپور کې راغلي چې د یادې پېښې له امله د یونان د ساحلي ګارډ دوه افسران ټپیان شوي، ۱۴ کډوالو ژوند له لاسه ورکړی او ۲۴ نور کډوال ژغورل شوي دي.
د یونان د حکومت یوه چارواکي ویلي چې په یاده کښتۍ کې شاوخوا ۳۵ کسان سپاره وو.
راپور کې د جزییاتو له ورکولو پرته راغلي، د یونان ساحلي ګارډ ویلي چې د بېړیو او کښتیو په مرسته د لټون او ژغورنې عملیات لا هم روان دي.
Views: 9
