د ننګرهار امنیه قومانداني وایي چې د دغه ولایت په شینوارو ولسوالۍ کې یې د پاکستانۍ کلدارو کارولو په تور ۱۸ کسان نیولي دي.
د نافذه قوانینو له مخې د بهرنۍ کرنسیو، په ځانګړي ډول د کلدارو راکړه ورکړه په مطلق ډول بنده ده او هیچا یا سوداګر ته اجازه نه ورکول کېږي چې په خپلو معاملو کې یې وکاروي.
د ننګرهار د امنیې قوماندانۍ خبرپاڼه کې راغلي چې د دغه ولایت په شینوارو ولسوالۍ کې ۱۸ کسان له یادو اصولو د سرغړونې په تور نیولي چې په بازار کې یې د افغانیو پر ځای پاکستانۍ کلدارې کارولې.
سرچینه زیاتوي چې نیول شوي کسان به له لومړنیو څېړنو وروسته عدلي او قضایي ارګانونو ته وسپارل شي.
خبرپاڼه کاږي، د ملي اقتصاد د ساتنې، د افغانیو د ارزښت خوندیتوب او د قانون حاکمیت د ټینګښت لپاره به دا ډول څارنه او اقدامات دوام ولري او له قانونه سرغړوونکي به د قانون منګولو ته وسپارل شي.
Views: 8
