ملګرو ملتونو خبرداری ورکړی چې افغانستان ته بېرته ستنېدل د بریالۍ بیا مېشتېدنې تضمین نه کوي، ځکه نوې شمېرې ښيي چې یوازې ۱۱ سلنه ستانه شوي افغانان توانېدلي دي کار پیدا کړي.
د یکشنبې په ورځ په خپور شوي راپور کې د کډوالۍ نړیوال سازمان (IOM) ویلي چې ډېری ستانه شوي کسان لا هم د بیا مېشتېدنې او د عاید د پیدا کولو په برخه کې له جدي ستونزو سره مخ دي.
د ارزونې له مخې، له هر څلورو ستنو شویو کسانو یو تن نه دی توانېدلی چې په خپل ټاکلي استوګنځي کې مېشت شي او راپور ښيي، ۲۵ سلنه ستانه شوي کسان نه دي توانېدلي چې خپلو اصلي ولسوالیو یا سیمو ته بېرته ورستانه شي.
همداراز له نیمایي څخه زیات کسان ضروري اسناد نه لري، چې له امله یې د لومړنیو خدمتونو او د کار موندنې فرصتونو ته د دوی لاسرسی سخت محدود شوی دی.
اقتصادي فشارونه هم لا شدید دي؛ د ستنو شویو کورنیو ۵۶ سلنه مشران وایي چې د خپلې کورنۍ لومړنۍ اړتیاوې نه شي پوره کولی.
د کار موندنې ستونزه تر ټولو لویه بلل شوې. د IOM په وینا، د ستنو شویو کورنیو ۳۵ سلنه مشران او ۳۶ سلنه هغه کسان چې په یوازې توګه بېرته ستانه شوي، لا هم بېکاره پاتې دي، چې دا موضوع د اوږدمهاله ثبات او دوامدار معیشت په اړه اندېښنې زیاتوي.
دا موندنې په داسې حال کې خپرېږي چې طالبانو ویلي، په ۲۰۲۵ کال کې شاوخوا ۱.۸ میلیونه افغان کډوال هېواد ته بېرته راستانه شوي دي.
نړیوال بنسټونه خبرداری ورکوي چې که کار، اسنادو او لومړنیو خدمتونو ته لاسرسی ښه نه شي، د کډوالو په پراخه کچه ستنېدا به د افغانستان له وړاندې نازک بشري او اقتصادي وضعیت نور هم خراب کړي.
Views: 11
