د امریکا ولسمشر د ایران د خلکو اعتراضونو ته غبرګون ښودلی او ویلي یې دي، که د ایران حکومت پر لاریون کوونکو ډزې وکړي، د امریکا متحده ایالات به د هغوی «ژغورنې» ته ورشي.
د امریکا ولسمشر، ډونالډ ترمپ، نن (جمعه) په ایکس (X) کې په یوه پیغام کې لیکلي چې متحده ایالات دې حالت ته چمتو دي.
نوموړي ویلي: «که ایران پر سولهییزو لاریون کوونکو ډزې وکړي او هغوی په تاوتریخوالي ووژني، چې دا یې دود دی، د امریکا متحده ایالات به د هغوی ژغورنې ته ورشي. موږ چمتو یو.»
د یادونې وړ ده چې ایران د روانې اوونۍ له پیله د ډالر د بیې او د توکو د قیمتونو د لوړېدو له امله د خپلو وګړو د اعتراضونو شاهد دی.
تر دې وړاندې، د ایران د حکومت ویاندې فاطمې مهاجراني د خپلې اوونیزې خبري ناستې پر مهال، د تهران په ځینو سیمو او ولسوالیو کې د اعتراضي غونډو د جوړېدو په تړاو ویلي وو: «موږ اعتراضونه پر رسمیت پېژنو؛ حکومت به نیوکه کوونکي غږونه هم واوري.»
Views: 1
