د جاپان په پلازمېنه توکیو کې د افغانستان سفارت وايي چې د ۲۰۲۶ کال د جنورۍ له ۳۱مې وروسته به خپل فعالیتونه وځنډوي.
په توکیو کې د افغانستان سفارت په خبرپاڼه کې راغلي چې یاده پرېکړه د جاپان د بهرنیو چارو وزارت له لوري له یو لړ مشورو وروسته شوې او د ۲۰۲۶ کال د جنورۍ له ۳۱مې وروسته به د سیاسي، اقتصادي، کلتوري او کنسولي چارو په ګډون د سفارت ټول فعالیتونه او خدمتونه تر بلې خبرتیا پورې وځنډول شي.
په اعلامیه کې ویل شوي چې یاده پرېکړه د جاپاني چارواکو سره په نږدې همغږۍ او د ۱۹۶۱ کال د وين د ډیپلوماتیکو اړیکو د کنوانسیون په پام کې نيولو سره شوې ده.
د افغانستان سفارت لیکلي چې د وين کنوانسیون له مخې به د جاپان حکومت د ماموریت د ځای (سفارت، شتمنۍ او ارشیف) خوندیتوب ته درناوی کوي او ساتنې ته به یې دوام ورکړي.
په اعلامیه کې له هغو افغانانو چې په جاپان کې مېشت دي غوښتنه شوې چې کنسولي خدماتو ته د بېرنۍ اړتیا په صورت کې د جنوري له ۳۱مې مخکې د سفارت کنسولي څانګې ته مراجعه وکړي.
د طالبانو د بهرنیو چارو وزارت تراوسه په دې اړه څه نه دي ویلي.
Views: 13
