د افغانستان او پاکستان د سوداګرۍ او صنایعو ګډې خونې راپور ورکړی چې د افغانستان او پاکستان ترمنځ د سوداګریزو لارو تړلکېدو، تر اوسه د پاکستان سوداګرۍ ته د ۴،۵ میلیارد امریکايي ډالر زیان اړولی دی.
د راپورونو له مخې، پاکستان شاوخوا دوه میاشتې مخکې وروسته له هغه له افغانستان سره ټولې سوداګریزې لارې وتړلې چې پاکستاني ځواکونو د افغانستان حریم نقض کړ او د ډیورنډ کرښې ته نږدې یې بریدونه وکړل او له هغه وروسته افغان ځواکونو هم غچاخیستونکي بریدونه وکړل.
د پاکستان له لوري د لارو له تړلو وروسته، اسلامي امارت هم له پاکستان سره سوداګریزه راکړه ورکړه بنده کړه او له صنعتکارانو او سوداګرو یې وغوښتل چې د پاکستان پر ځای بدیلې سوداګریزې لارې وکاروي. افغان چارواکو ویلي، دا چې پاکستان په ځلونو سوداګریزې لارې تړلې او سوداګریز او بشري موضوعات یې د سیاسي موخو لپاره کارولي، نو اسلامي امارت هم اړ شو څو دغه پرېکړه وکړي.
د پاکستان «ډان» ورځپاڼې د پاکستان او افغانستان د سوداګرۍ او صنایعو د ګډې خونې (PAJCCI) د یوې اعلامیې په حواله راپور ورکړی چې د افغانستان او پاکستان ترمنځ د لارو تړلکېدو، د هر کال د میلیاردونو ډالرو په ارزښت یو مهم سوداګریز دهلېز فلج کړی دی.
د سرچینې په خبره، د لارو له تړلکېدو مخکې د دواړو هېوادونو ترمنځ د دوه اړخیزې سوداګرۍ کچه په کال کې شاوخوا ۲ تر ۳ میلیارد ډالرو وه او د اوچ په فصلونو کې – په ځانګړې توګه د کرنې او ودانیزو برخو کې – د پاکستان ورځني صادرات ۵۰ تر۶۰ میلیون ډالرو ته رسېدل چې سمنټ، بوره، مالټې، کچالو، درمل او د جراحي وسایل پهکې شامل وو.
سرچینې د اعلامیې په حواله زایاته کړې چې د سوداګرۍ اوسني ځنډ تر اوسه پاکستان ته څه باندې ۴.۵ میلیارد امریکايي ډالر زیان رسولی دی.
په راپور کې راغلي چې د دغه وضعیت د دوام په صورت کې به موسمي صادرات لکه مالټې او کچالو – چې د صادراتو وخت یې له ډسمبر تر مارچ پورې دی، له نږدې ۲۰۰ میلیون ډالر اضافي زیان سره مخ شي.
په راپور کې د سرچینې په حواله راغلي چې د سمنټو صنعت له هغو سکټورونو دی چې تر ټولو ډېر زیان یې لیدلی، ځکه افغانستان د پاکستان د سمنټو د صادراتو لپاره یو له لویو بازارونو و او په ورته وخت کې، له افغانستانه د ډبرو سکرو د وارداتو بندېدو د پاکستان په شمال لوېدیځو سیمو کې د صنعتي تولیداتو لګښتونه لوړ کړي دي.
سرچینه زیاتوي چې د درملو او جراحي وسایلو سوداګري چې په کال کې به یې نږدې ۲۰۰ میلیون ډالر ارزښت درلود، په بشپړه توګه درېدلې چې دې چارې د پاکستان د درملو د تولید شرکتونو ته په لویه کچه زیان رسولی دی.
ډان ورځپاڼې د اعلامیې له مخې لیکلي چې د لارو د تړلکېدو له امله لسګونه زره کارګران بېکاره شوي، په افغانستان کې بزګران هم زیانمن شوي او څه باندې ۸زره باروړونکي موټر په تورخم او چمن کې ایسار پاتې دي چې هره ورځ ډیمرج لګښتونه ورباندې راځي.
Views: 18
