په برېتانیا کې له هغو دوو ۱۷ کلنو افغانانو چې پر یوې ۱۵ کلنې نجلۍ پر جنسي تېري تورن دي، یو پر لس کاله او اته مياشتې او بل پر نهه کاله او لس میاشتې بند محکوم شوي دي.
د راپورونو له مخې، د جهانزیب او اسرار په نومونو دغه افغانان تورن دي چې د مې مياشتې په لسمه یې پر یوې ۱۵ کلنې نجلۍ جنسي تېری کړی دی.
د بيبيسي د راپور له مخې، جهانزېب ته د لسو کلونو او اتو مياشتو او اسرار ته د نهو کلونو او لسو مياشتو سزا اورول شوې او دواړو ته له برېتانیا د ايستل کېدو اسناد هم ورکړل شوي دي.
د راپورونو له مخې، یاد دواړه هلکان به لومړی د تنکيو مجرمینو په يوه اصلاحاتي مرکز کې خپله سزا پیل کړي او وروسته به زندان ته ولېږدول شي.
د سزا اورېدنې پر مهال څارنوال شان ويليمز ویلي، تورن کسان چې هر يو له خپل ژباړن سره حاضر شوي، بې سرپرسته پناغوښتونکي ماشومان دي.
د نجلۍ مور په یوه بيان کې محکمې ته ویلي: «زموږ فعاله، خوشحاله او پر خپل ځان باوري لور، زموږ د سترګو پر وړاندې راولوېده، له داسې سخت خپګان سره مخ شوه چې ډېری وخت فزیکي ناروغه کېږي.»
Views: 1
