د امریکا د کورني امنیت وزارت ویلي چې د دغه هېواد د کډوالۍ او ګمرکونو ادارې (ICE) کسانو یو افغان د داعش ډلې د خراسان څانګې د ملاتړ په تور نیولی دی.
د دغه وزارت د اعلامیی له مخې، نیول شوی کس جانشاه صافی په ۲۰۲۱ کال کې د بایډن ادارې د «متحدینو ښه راغلاست» پروګرام له لارې امریکا ته تللی او د ۲۰۲۵ کال د روانې ډسمبر میاشتې په ۳مه د ویرجینیا ایالت په وینزبروي ښار کې ونیول شوی دی.
د امریکا د کورني امنیت وزیرې کریسټي نُوم ویلي چې دغه کس امریکا ته داخلېدو پر مهال قانوني اسناد نه لرل او د هغه د لنډمهاله خونديتوب (TPS) غوښتنلیک هم د افغانانو لپاره د دغه پروګرام له لغوه کېدو وروسته د اړوندې ادارې له لوري رد شوی و.
هغه دغه راز ویلي چې د بایډن د حکومت پر مهال نږدې ۱۹۰ زره افغانان له لازمو امنیتي ارزونو پرته امریکا ته داخل شوي دي.
د هغه په خبره، د ټرمپ حکومت د ۲۰۲۵ کال د جنوري په ۲۰مه د واک له ترلاسه کولو وروسته د کډوالۍ پروګرامونو له لارې د افغانانو د مېشتېدنې لړۍ درولې ده.
د راپورونو له مخې، جانشاه صافي د افغانستان د پخواني حکومت پر مهال د کونړ د ملي امنیت رئیس او د ننګرهار د ملي امنیت مرستیال پاتې شوی دی. همداراز د جانشاه صافي پلار، حاجي جانداد خان چې په ۲۰۲۲ کال کې مړ شوی، د برهانالدین رباني د حکومت پر مهال د کونړ والي و. حاجي جانداد خان د احمدشاه مسعود له نږدې متحدینو څخه و چې د شوروي او طالبانو پر ضد یې جګړه کړې وه او د ختیځ افغانستان له بانفوذو څېرو ګڼل کېده.
Views: 9
