د روغتیا نړۍوال سازمان وایي، په افغانستان کې د شري واکسین ملي کمپاین په دوو پړاوونو کې تر ۱۶.۶ میلیون د ډېرو ماشومانو واکسین کېدل ښیي چې دغه سازمان، د افغانستان روغتیایي چارواکي او همکارې ادارې د مخنیوي وړ ناروغیو پر وړاندې د ماشومانو خوندیتوب ته ژمن دي.
د روغتیا نړۍوال سازمان (ډبليواېچاو) او د ملګرو ملتونو د ماشومانو د ملاتړ صندوق (یونیسف) په ګډه خبرپاڼه کې چې ډبليواېچاو پژواک خبري اژانس ته استولې، راغلي چې دغه سازمان، یونیسف او د ګاوي ادارې، د افغانستان د کتلوي معافیت ملي ادارې په همکارۍ د شري واکسین ملي کمپاين دویم پړاو په برياليتوب سره پای ته ورساوه.
د سرچینې د معلوماتو له مخې، دغه کمپاين د اکټوبر په ۲۹مه پيل شوی و او لس ورځې يې دوام وکړ چې په لړ کې یې د هېواد په کچه د ګرم اقليم لرونکو ۱۷ولايتونو شاوخوا ۸،۳۵۵،۴۴۶ هغو ماشومانو ته چې عمر یې له ۶ مياشتو تر لسو کلونو و، د شري واکسین ورکړل شول.
خبرپاڼه کې راغلي چې دا شمېر د ټاکل شوو نهه میلیون ماشومانو ۹۱،۷ سلنه جوړوي.
سرچینه زیاتوي، سربېره پر دې په پنځو سوېلي او يو سوېلختيځو ولايتونو کې ۳،۹۵۳،۹۶۱ هغو ماشومانو ته چې له زېږون څخه تر ۱۰ کلونو عمر لري، د پوليو واکسین هم ورکړل شوی دی.
په خبرپاڼه کې راغلي چې د شري واکسین ملي کمپاين په لومړي پړاو کې – چې د روان کال په اکټوبر میاشت کې بشپړ شو- د سوړ اقليم لرونکو ۱۷ ولايتونو ۸.۳ميليون ماشومانو ته دغه واکسین طبیق شو.
د سرچینې د څرګندونو له مخې، دا ښیي چې افغانستان خپلې هڅې غځوي څو ټول ماشومان واکسین ته لاسرسی ولري.
په خبرپاڼه کې راغلي چې لومړی پړاو، د شري ناروغۍ د پرلهپسې خپرېدو او د روټین واکسیناسیون د ټيټې کچې له امله پيل شو؛ ځکه چې يوازې ۵۱ سلنه ماشومانو د شري لومړۍ دوره واکسین او ۳۷ سلنه ماشومانو دویمه دوره واکسین ترلاسه کړی و.
د خبرپاڼې له مخې، د دغه پړاو بريالي تطبیق د معافيت جدي تشې ډکولو کې مرسته وکړه او د هغو ماشومانو د تشخیص لپاره یې بنسټ کېښود چې له واکسینه پاتې شوي وو، څو روټین واکسیناسیون لا پياوړی شي او هېواد د شري د کنټرول پر لور پرمختګ وکړي .
سرچینه زیاتوي: «د افغانستان د شري واکسین ملي کمپاين د دواړو پړاوونو له بريالي بشپړېدو سره، اوس تر ۱۶،۶ ميليون ډېر ماشومان د شري له دې وژونکې خو د مخنيوي وړ له ناروغۍ خوندي شوي دي. دا لاستهراوړنه د افغانستان د روغتيايي چارواکو ژمنتيا او د روغتیا نړۍوال سازمان، یونسیف او د افغانستان د کتلوي معافیت ملي ادارې نه ستړېکېدونکې هڅې او د ګاوي ادارې د ملاتړ ښکارندویه ده. یاد اړخونه په ګډه د روټین واکسيناسیون خدمتونه پياوړي کوي او د معافيت تشې بندوي، څو په هېواد کې هيڅ ماشوم له روغتیا محروم پاتې نه وي.»
په افغانستان کې د روغتیا نړۍوال سازمان استازي ډاکټر اډوين سينيزا سلواډور هم ورته څرګندونې کوي او زیاتوي: «له ټاکل شوي هدفه ۹۱،۷ سلنه ماشومان واکسینول يو ستر پرمختګ دی، خو زموږ هڅې تر هغو دوام کوي چې هر ماشوم ته ورسېږو، په ځانګړي ډول هغو ته چې په لرو پرتو سيمو کې اوسېږي. د روغتیا نړۍوال سازمان به د معافيت برخه کې د شته تشو ډکولو په موخه او د دې لپاره چې هيڅ ماشوم له روغتیايي خدمتونو محروم پاتې نه شي، خپلې هلې ځلې دوامداره وساتي.»
دغهراز، په افغانستان کې د یونسیف استازي ډاکټر تاجالدین ایووالي وایي: «د کمپاین دویم پړاو بشپړېدل پر هغه لور يو بل مهم ګام دی څو د افغانستان ماشومان له داسې یوې ناروغۍ خوندي شي چې هيڅکله بايد د يوه ماشوم ژوند وانه خلي. د هرې ټولنې په هر ډول شرايطو کې ميليونونه ماشومانو ته رسېدل يوازې هغه وخت امکان لري چې کورنۍ، روغتيايي کارکوونکي او همکاران د ماشومانو د خوندیتوب لپاره سره یو شي.»
هغه وایي، یونیسف به د روټین واکسيناسیون د پياوړتيا لپاره خپلې هڅې روانې وساتي، څو هر هلک او نجلۍ هغه واکسينونه ترلاسه کړي چې د سالمې ودې لپاره ورته اړتيا لري.
Views: 1
