د راپورونو له مخې، د پاکستان د څو ګوندونو ګډ اپوزیسیون، د دغه هېواد د اساسي قانون ۲۷م هغه اصلاحي تعدیل په غبرګون کې لاریون کړی چې «د ځواک توازن د پوځ په ګټه او د مدني بنسټونو په زیان بدلوي.»
د راپورونو له مخې، د پاکستان حکومت څو ورځې مخکې د اساسي قانون ۲۷مې اصلاحي لایحې مسوده سنا مجلس ته وړاندې کړه. په راپور کې راغلي وو چې دغه وړاندیز په اسلاماباد کې د سیاسي جنجال څپه راپورته کړې ده؛ داسې چې مخالف ګوندونه او د مدني حقونو ډلې وایي، دغه اقدام ښايي د ځواک توازن د پوځ په ګټه او د مدني بنسټونو په زیان بدل کړي.
وروسته د پاکستان مشرانو جرګې دغه تعدیل منظور کړ.
د جیونیوز د خبر له مخې، د پاکستان د څو ګوندونو ګډ اپوزیسیون د یاد هېواد د اساسي قانون د بېرته رغولو غوښتنه کړې او ویلي یې دي چې په همدې تړاو نن د هغه هېواد له پارلمان نه تر سترې محکمې لاریون کوي.
د پاکستان «مجلس وحدت مسلمین پاکستان» پر خپله ټویټرپاڼه لیکلي چې د دوی او د پاکستان د قانون ساتنې تحریک کسانو نن قانون کې د ۲۷م بدلون په غبرګون کې د پارلمان له ودانۍ تر سترې محکمې د لاریون له لارې احتجاج وکړ.
د راپور له مخې، د مجلس وحدت المسلمين مشر علامه راجا ناصر عباس ویلي، اوس یې وخت دی چې خلک له کورونو راووځي څو راتلونکي نسلونه وژغورل شي.
دغهراز، «تحریک تحفظ آیین پاکستان» پر خپله اېکسپاڼه د لاریون ویډیوګانې خپرې کړې چې د دغه تحریک مشر محمودخان اڅکزی په کې خبرې کوي.
اڅکزی وایي: «پاکستانيانو! راپاڅئ، … اساسي قانون وژغورئ. که نه، خدای مه کړه داسې څوک به پیدا شي چې وبه وايي: موږ دا اساسي قانون نه منو، تاسې راشئ نوی اساسي قانون جوړ کړئ؛ ځکه چې تاسې اوسنی اساسي قانون څېرې کړی دی. دا به یو ډېر ستر بحران رامنځته کړي.»
د راپور له مخې، د پاکستان تحریک انصاف ګوند استازي اسد قیصر ویلي چې د امنیت ټینګښت د امنیتي ادارو او حکومت دنده ده خو حکومت ټوله ورځ د مخالفینو پر ضد د مقدمو جوړولو او پر ناحقه اساسي قانوني تعدیلاتو بوخت دی.
Views: 7
