د متحده ایالتونو ولسمشر ویلي چې راتلونکې اونۍ به د بيبيسي خبري شبکې پر وړاندې د ۲۰۲۱ کال د جنوري په ۶مه د پانوراما په یوه مستند کې د هغه د وینا د ځینو برخو د ایډېټ په تړاو تر پنځه میلیارد ډالرو پورې حقوقي دعوه ثبت کړي.
بيبيسي پرون لیکلي چې د امریکا له ولسمشر ډونالد ټرمپه یې د ۲۰۲۱ کال د جنورۍ په ۶مه د پانوراما په یوه مستند کې د هغه د وینا د برخو د ایډېټ په اړه بښنه غوښتې خو د ټرمپ د تاوان غوښتنه یې رد کړې ده. بیبیسي زیاتوي چې دغه ایډېټ «دا غلط تصور پیدا کړی و چې ګواکې ولسمشر ټرمپ په مستقیم ډول د تاوتریخوالي غوښتنه کړې» او اعلان یې کړی چې دغه پروګرام به نور خپور نه کړي.
د راپورونو له مخې، د ټرمپ وکیلانو له دې مخکې بيبيسي ته ویلي وو چې که دغه مستند د جمعې تر ورځې بېرته وانخلي نو د «څه کم یو میلیارد ډالرو» حقوقي دعوې سره به مخ شي.
د رویټرز د نن ورځې راپور له مخې، د متحده ایالتونو ولسمشر ډونالد ټرمپ د فلوریدا پر لور د سفر پر مهال خبریالانو ته ویلي: «ښايي راتلونکې اونۍ له هغوی د یو تر پنځه میلیارد ډالرو حقوقي دعوه وکړو. هغوی خپله اعتراف کړی چې درغلي یې کړې او زما خبرې یې اړولې دي.»
د هغه په وینا، تر اوسه یې په دې اړه د برېتانیا له لومړي وزیر کیر استارمر سره خبرې نه دي کړې خو پلان لري چې راتلونکو ورځو کې ورسره اړیکه ونیسي. ټرمپ وايي استارمر هڅه کړې چې ورسره اړیکه ونیسي او د دې پېښې له امله «ډېر شرمنده» دی.
د ډونالد ټرمپ د خبرو د ایډېټ پر سر شخړې له امله د بيبيسي د عمومي مدیر، ټیم ډیوي او د خبرونو د څانګې مشرې دبورا ټرنس د یکشنبې په ورځ استعفا ورکړې ده.
Views: 5
