د ایران د بهرنیو چارو وزیر د پاکستان د لومړي وزیر له مرستیال او بهرنیو چارو له وزیر سره ټیلېفوني خبرو کې د سیمې د اغېزناکو هېوادونو په همکارۍ د افغانستان او پاکستان ترمنځ د خبرو اترو د دوام پر اړتیا ټینګار وکړ.
د پاکستان د پوځي رژیم له لوري پر افغانستان له بریدونو او بیا د افغانستان له غچاخیستونکو بریدونو وروسته، د قطر او ترکیې په منځګړیتوب د کابل او اسلاماباد ترمنځ یو ځل په دوحه او دوه ځلې په استانبول کې مذاکرات وشول.
په استانبول کې وروستي مذاکرات پرون پای ته ورسېدل او د اسلامي امارت ویاند وویل چې د پاکستاني پلاوي غیرمسوولانه چلند او نه همکاري د دې لامل شول چې د ا.ا د ښه نیت او د منځګړو د هڅو سربېره، د ترکیې مذاکرات کومې پایلې ته ونه رسېږي.
د ایران د بهرنیو چارو وزارت په خبرپاڼه کې راغلي چې د دغه هېواد د بهرنیو چارو وزیر سیدعباس عراقچي د پاکستان د لومړي وزیر له مرستیال او بهرنیو چارو له وزیر محمداسحاق ډار سره د وروستیو دوه اړخیزو اړیکو او د سیمې او نړۍوالو بدلونونو په اړه ټيلېفوني خبرې کړې دي.
سرچینې لیکلي چې عراقچي د دواړو ګاونډیو او مسلمانو هېوادونو ترمنځ د اوږدو او دوستانه اړیکو پر اهمیت د ټینګار ترڅنګ، په بېلابېلو برخو کې د اړیکو پر پراختیا ټینګار کړی دی.
د بهرنیو چارو وزارت لیکلي چې عراقچي د افغانستان او پاکستان ترمنځ د اوسني وضعیت په اړه د اندېښنې په څرګندولو سره، د سیمې د اغېزناکو هېوادونو په همکارۍ د اختلافاتو د حل او د تاوتریخوالي کمولو لپاره د دواړو لورو ترمنځ د خبرو د دوام پر اړتیا ټینګار کړی او دې موخې ته د رسېدو لپاره یې د ایران د هر ډول همکارۍ چمتووالی ښودلی دی.
سرچینې زیاته کړې چې د پاکستان د بهرنیو چارو وزیر له وروستیو تحولاتو وروسته د دغه هېواد او افغانستان ترمنځ د مذاکراتو د پایلو او وروستي وضعیت په تشریح کولو سره، په سیمه کې د سولې او ټیکاو ساتلو پر اهمیت ټینګار کړی دی.
د سرچینې په خبره، دواړو خواوو په دې اړه د مشورو پر دوام هوکړه کړې ده.
Views: 1
