د اسلامي همکاریو سازمان، کاناډا او سویس د افغانستان په ختیځ کې د وړمې شپې پر مرګونې زلزلې د خواشینۍ څرګندولو ترڅنګ د مرستو ژمنه کړې او د اسلامي نړۍ د ټولنې سرمنشي، اوزبېکستان او د چک جمهوریت هم د غمرازۍ پیغامونه خپاره کړي دي.
دغه زلزله چې وړمه شپه شاوخوا ۱۲ بجې وشوه، د امریکا د ځمکپېژندنې ادارې د ريښتر په کچه ٦ درجې ښودلې ده.
د طالبانو ویاند ذبیح الله مجاهد پر اېکسپاڼه لیکلي چې د کونړ په مرکز اسعداباد او په نورګل، څوکۍ، چپه دره، پېچ دره او وټهپور ولسوالیو کې د زلزلې له امله تر دې دمه د شهیدانو شمېر ۱۴۱۱ او د ټپیانو ۳۱۲۴ ته رسېدلی دی.
هغه دغهراز لیکلي چې په یادو سیمو کې د زلزلې له امله ۵۴۱۲ کورونه ویجاړ شوي دي.
دا په داسې حال کې ده چې د افغاني سرې مياشتې ټولنې لږ مخکې ویلي وو چې په کونړ، ننګرهار او لغمان ولایتونو کې په یاده مرګونې زلزله کې د مړه شوو کسانو شمېر ۱۱۲۴ او د ټپيانو ۳۲۵۱ ته رسېدلی او له اته زره ډېر کورونه ویجاړ شوي دي.
د اسلامي همکاریو سازمان (اوایسي) سرمنشي حسین ابراهیم طه په یادو ولایتونو کې له زیانمنو کورنیو سره د خواخوږۍ په څرګندولو ویلي، دغه سازمان چمتو دی په دې سختو شېبو کې له زیانمنو سره مرستې وکړي.
هغه په افغانستان کې د «اوایسي» دفتر ته لارښوونه کړې چې له اړوندو چارواکو سره د اړتیاوو ارزونې برخه کې همغږي او د بشري مرستو له ادارو او شریکانو سره نږدې کار وکړي څو زیانمنو خلکو ته مرستې ورسوي.
د اسلامي نړۍ د ټولنې سرمنشي محمد بن عبدالکریم العیسی پر خپله اېکسپاڼه، د افغانستان په ختیځ کې د زورورې زلزلې په پایله کې د ګڼ شمېر کسانو پر مرګژوبلې خواشیني څرګنده کړې ده.
د کاناډ لومړي وزیر مارک کارني پر خپله اېکسپانه د افغاستان ختیځ کې له زلزلې وروسته وضعیت وحشتناک یاد کړی او ویلي یې دي، کاناډا چمتو ده چې د خپلو همکارو ادارو له لارې بشري مرستې وکړي.
دغه راز، د اوزبېکستان ولسمشر شوکت میرضیایوف هم د افغانستان د زلزلې له قربانیانو سره خواخوږي څرګنده او ټپیانو ته یې د روغتیا غوښتنه کړې ده.
د چک جمهوریت د بهرنیو چارو وزارت هم له زلزلهځپلو سره غمرازي ښودلې ده. یاد وزارت پر خپله اېکسپاڼه لیکلي: «موږ خپله ژوره خواخوږي له ټولو هغو کسانو سره څرګندوو چې د افغانستان د کونړ او ننګرهار په ولایتونو کې د ویجاړوونکي زلزلې له امله اغېزمن شوي دي؛ چک جمهوریت د افغانستان له خلکو سره خپل یووالی څرګندوي.»
د سویس د بهرنیو چارو وزارت پر اېکسپاڼه لیکلي چې د افغانستان په ختيځ کې د زلزلو له امله له زیانمن شوو سره خواخوږي کوي. دغه وزارت وايي چې په کابل کې د خپل بشري دفتر له لارې له زیانمنو کورنیو سره مرستې کوي.
له دې مخکې د امریکا متحده ایالتونو، برېتانیا، روسیې، مصر، متحده عربي اماراتو، بنګلهدېش، قطر، سوریې، سعوديعربستان، جاپان، ترکیې، هند، پاکستان او ایران هم د دې مرګونې زلزلې له زیانمن شوو سره خواخوږي څرګنده کړې وه. ملګرو ملتونو او اروپايي ټولنې هم د خواشینۍ د څرګندولو ترڅنګ ویلي وو چې د دوی ټیمونه د بېړنیو مرستو لپاره سیمې ته استول شوي دي.
Views: 5
