د مرکزي اسیا د فوټبال کنفدراسیون د ۲۰۲۵ کال د اسیا د ملتونو جام (کافا) د ګروپي سیالیو مهالوېش اعلان کړی چې له مخې یې د افغانستان د فوټبال ملي لوبډله به خپله لومړۍ لوبه د وږي په اوومه له ایران سره ترسره کړي.
د مرکزي اسیا د فوټبال کنفدراسیون نن پر خپله فېسبوکپاڼه لیکلي، دوی خوښ دي چې د ۲۰۲۵ کال د اسیا د ملتونو جام (کافا) د ګروپي سیالیو رسمي مهالوېش شریکوي.
په دغو سیالیو کې د افغانستان د فوټبال ملي لوبډله په B ګروپ کې له ایران، تاجکستان او هند سره لوبېږي چې د یادو لوبډلو لوبې به په تاجکستان کې ترسره شي.
د دغه مهالوېش له مخې، افغانستان به خپله لومړی لوبه د روانې اګسټ میاشتې په ۲۹مه له ایران سره، دویمه لوبه به د راتلونکې سپټمبر میاشتې په لومړۍ له تاجکستان سره او درېیمه لوبه به د همدې میاشتې په څلورمه د هند له لوبډلې سره ترسره کړي.
همدارنګه د دغو سیالیو په A ګروپ کې اوزبېکستان، قرغیزستان، ترکمنستان او عمان لوبډلې شاملې دي چې لوبې به یې په اوزبېکستان کې ترسره شي.
د مرکزي اسیا د کنفدراسیون د معلوماتو له مخې، یادې سیالۍ د اګسټ په ۲۹مه پیلېږي او د سپټمبر میاشتې تر اتمې پورې به دوام ولري.
Views: 1
