د ۲۰۲۵ کال د جولای په ۱۹مه نېټه، د “ملي مرکې” په نامه غونډه د جرمني په کلن ښار کې ترسره شوه. په دې غونډه کې نږدې ۷۰ تنه سياسي، علمي او ټولنيزو شخصيتونو او ځوانو فعالانو ګډون درلود، چې هدف یې د افغانستان د روان وضعیت ارزونه، د ملي يووالي پیاوړتیا او د افغان دیاسپورا رول په سولې، بیا رغونه او د هېواد د راتلونکي په جوړونه کې و.
غونډه د ملي مرکو د هغو غونډو لړۍ ده چې مخکې په لندن، برلین او برمینګهم کې جوړې شوې وې او دا ځل په کولن کې په یوه علمي، تعاملي او مشارکتي فضا کې تنظیم شوه.
د غونډې پرانیسته مطیعالله رووفي د ښه راغلاست له وینا سره وکړه. ورپسې استاد بصیر احمد دانشیار د ملي مرکې اهداف او جوړښت تشریح کړ، او بیا ډاکتر خوشال روهي د ملي مرکې مفاهیم، موخې، ځانګړتياوې او د پراختیا پړاوونه په لنډه توګه حاضرینو ته وړاندې کړل.
وروسته د ازادو بحثونو لړۍ پيل شوه، چې اسانچاري او چلول يې د استاد رشاد حکيم او استاد سيد فهيم سادات پر غاړه و. په لومړۍ برخه کې د ملي يووالي، سولې او پرمختګ پر وړاندې پر اساسي خنډونو، ننګونو او لومړيتوبونو تحلیلي بحثونه وشول او په دويمه برخه کې د همدغو ستونزو پر حل لارو جامع خبرې وشوې.
د غونډې مهمه ځانګړتیا د ګډونوالو فعاله ونډه وه؛ دوی د پوښتنو، نظریاتو او وړاندیزونو له لارې بحثونه بډایه او پیاوړي کړل.
ګډونوالو په ایران او پاکستان کې د افغان مهاجرو د خراب وضعیت او همداراز د نجونو پر وړاندې د ښوونځیو او پوهنتونونو د بندېدو په اړه هم ژوره اندېښنه وښودله، او په همدې اړه يې د ملي مرکې له ادرسه د رسمي اعلاميو د خپرولو غوښتنه وکړه.
په کولن کې د ملي مرکې د غونډو او فعاليتونو د دوام لپاره د يوې دايمي څانګې د جوړولو لپاره يوه رضا کاره کار ډله جوړه شوه او راتلونکي ګامونه هم اعلان شول.
د غونډې په پای کې د افغانستان د زړور، ژبور او نقاد شاعر ارواښاد مطیع الله تراب فاتحه واخيستل شوه او روح ته يې دوعا وشوه.
ملي مرکه یو ولسمحوره نوښت دی چې، د افغان روڼاندو، علمي–فرهنګي شخصیتونو او ټولنیزو فعالانو لهخوا په اروپا کې پیل شوی دی. دا مرکې هڅه کوي چې د افغانانو، په ځانګړي ډول د مهاجرو، غږ د ملي بحثونو برخه وګرځي او د هېواد د راتلونکې په جوړونه کې مؤثره ونډه واخلي.
Views: 19
