د امریکا په ماساچويسټ ایالت کې د بوډاګانو په یوه پالنځای کې د اورلګېدنې له امله نهه کسان مړه شوي دي.
رویټرز اژانس د یاد هېواد د چارواکو له قوله راپور ورکړی، د یادې پېښې په پایله کې چې د امریکا ماساچوست ایالت بوسټون سیمې ته نږدې شوې، لږ تر لږه ۳۰ نور کسان ټپیان شوي دي.
د ماساچوست سیمې د اوروژنې ادارې ویاند جیک وارک ویلي چې شاوخوا ۷۰ کسانو د بوډاګانو په دې پالنځي کې ژوند کاوه.
هغه زیاته کړې چې د اور مړ کولو لپاره شاوخوا ۵۰ اوروژونکي سیمې ته ورغلي وو.
نوموړي څرګنده کړې چې اوروژونکو د یاد پالنځي ډېری اوسېدونکي ژغورلي، څو کسانو د پېښې په ځای کې ژوند له لاسه ورکړی او ډېری نور روغتون ته لېږدول شوي دي.
په راپور کې راغلي چې د یوه ټپي وضعیت د اندېښنې وړ ښودل شوی دی.
چارواکو ویلي، د یادې پېښې د لامل څېړلو په حال کې دي.
Views: 1
