لوګر کې سیمهییز مسوولین وایي چې وروستیو سېلابونو د دغه ولایت په مرکز پلعلم، محمداغې، برهکيبرک او ازرې ولسوالیو کې د استوګنې شاوخوا ۲۵۰کورونه نړولي او د درېیو ماشومانو په ګډون یې پنځو کسانو ته مرګژوبله اړولې ده.
د لوګر د والي ویاند صدیقاحمد صدیقي پژواک ته وویل، وروستیو سېلابونو په دغه ولایت کې ۵۰ کورونه په بشپړ ډول او دوه سوه نور نيمه ویجاړ کړي دي.
هغه زیاته کړه، یادو سېلابونو ۱۵ زره جریب کرنیز فصلونه او باغونه هم لهمنځه وړي او دغه راز ګڼې کلیوالي لارې، پلونه او پلچکونه یې هم تخریب کړي دي.
د نوموړي په خبره، په لوګر کې د بېلابېلو ادارو له لوري د سېلابځپلو کورنیو سروې پيل شوې او ژر به بېړنې مرستې ووېشل شي.
د لوګر د والي ویاند دغه راز وایي چې د وروستیو سېلابونو له امله په دغه ولایت کې درې ماشومان مړه او دوه کسان نور ټپيان شوي دي.
نوموړي زیاته کړه: «یو ماشوم د محمداغې ولسوالۍ په پل کندهاري سیمه کې، دویم ماشوم د برهکيبرک ولسوالۍ په شاه مزار سیمه کې او درېیم د ازرې ولسوالۍ په ببرو سیمه کې مړه او دوه کسان نور په محمداغې ولسوالۍ کې ټپیان شوي دي.»
بلخوا، د لوګر د مرکز پلعلم ښار یوه اوسېدونکي نعمتالله پژواک ته وویل، وروستیو سېلابونو په مرکز پلعلم، محمداغه او ازره ولسوالیو کې خلکو ته درانه مالي زیانونه اړولي دي.
هغه له حکومت او نړۍوالو بنسټونو وغوښتل چې په دغه ولایت کې له سېلابځپلو کورنیو سره بېړنۍ مرستې وکړي.
د لوګر د مرکز پلعلم سېلابځپلې یوې کورنۍ غړي روحالله پژواک ته وویل چې د دغه ولایت په ځینو سیمو کې سېلابونه راوتلي او خلکو ته یې درانه مالي او ځاني زیانونه اړولي دي.
هغه پر حکومت او نړۍوالو مؤسساتو غږ وکړ چې د لوګر ولایت له سېلابځپلو سره بېړنې مرستې وکړي.
Views: 2
