په افغانستان کې د اروپايي ټولنې استازولۍ د «کډوالو نړۍوالې ورځې» په مناسبت ویلي چې د زدهکړو، روغتیا او معیشت په برخو کې د افغان کډوالو ملاتړ کوي.
نن (د جون ۲۰مه) د کډوالو له نړۍوالې ورځې سره برابره ده، دغه ورځ کډوالو ته د درناوي په موخه د ملګرو ملتونو له لوري د کډوالو د نړیوالې ورځې په نوم نومول شوې ده.
افغانستان کې د اروپايي اتحادیې استازولۍ پر خپله اېکسپاڼه لیکلي چې د ایران، پاکستان او مرکزي اسیا په ګډون، په سیمه کې د زدهکړو، روغتیا او معیشت برخو د افغان کډوالو او پناهغوښتونکو ملاتړ کوي.
سرچینې زیاته کړې چې د افغان پناهغوښتونکو، کډوالو، بېځایه شوو او راستنېدونکو د زدهکړو، روغتیا او معیشت د ملاتړ لپاره یې د کډوالۍ له نړۍوال سازمان سره ۴۷ میلیون یورو مرسته کړې ده.
دغه دفتر لیکلي چې په هېواد او سیمه کې د افغان کډوالو او داخلي بېځایه شوو ستونزو ته د رسېدو په موخه د دوامداره حللارې موندلو لپاره د ملګرو ملتونو د کډوالو له عالي کمیشنریو سره همکاري کوي.
د کډوالو او راستنېدونکو چارو وزارت د معلوماتو پر اساس، دا مهال شاوخوا ۷ میلیون افغان کډوال په مختلفو هېوادونو کې ژوند کوي. د معلوماتو له مخې، له دې ډلې شاوخوا درې میلیونه یې په ایران، درې میلیونه په پاکستان کې او پاتې نور یې په نورو هېوادونو کې دي چې ځینې یې په هېوادونو کې د استوګنې قانوني اسناد لري او ځینې یې په ناقانونه توګه هلته اوسیږي.
د راپورونو پربنسټ، د کډوالو په چارو کې د ملګرو ملتونو د عالي کمیشنرۍ وروستی راپور ښیي چې شخړې، ځورونې او نورو ګواښونه د دې لامل شوي چې د ۲۰۲۳ کال په پای کې په نړۍ کې شاوخوا ۱۱۷ میلیون خلک په زور له خپلو مېنو بېځایه شي.
Views: 3
