د ایران او اسرائیلو جګړه دوام لري؛ ټرمپ ویلي، د ایران د مشر په نښه کول اسانه دي، خو د اوس لپاره دا کار نه کوي، خو د یوه امریکایي سناتور په وینا، په دې جګړه کې د امریکا د ښکېلتیا «ناوریني تېروتنه» به په منځني ختیځ کې پر امریکايي اډو د پراخو بریدونو لامل شي.
اسرائیلو د تېرې جمعې په سهار د ایران پر ځینو تاسیساتو او سیمو هوايي بریدونه وکړل، وروسته بیا ایران هم پر اسرائیلو د ځوابي بریدونو لړۍ پیل کړه، وروسته تر اوسه دواړه لوري پر یو بل بریدونه کوي؛ په بریدونو کې دواړو لورو ته مالي زیانونه او ځاني تلفات اوښتي خو کره شمېر یې معلومه نه ده.
رویټرز راپور ورکړی چې ایران او اسرائیل نن چهارشنبې یو ځل بیا یو پر بل د توغندیو بریدونه کړي دي.
راپور کې د اسرائیلو د پوځ له قوله راغلي، د نن سهار په لومړیو دوو ساعتونو کې له ایرانه دوه ځلې توغندي د اسرائیلو پر لور توغول شوي دي.
راپور زیاتوي، اسرائیلو د تهران په سوېللوېدیځه سیمه کې مېشتو اوسېدونکو ته ویلي چې سیمې پرېږدي، څو هوايي ځواک یې وکولای شي د ایران پوځي تاسیسات بمبار کړي.
الجزیزې هم نن سهار د جزئیاتو له ورکولو پرته لیکلي چې په تهران کې د چاودنو غږونه اورېدل شوي او په اسرائیلو کې د ایران له لوري د یوه توغول شوي توغندي له امله اورلګېدنه رامنځته شوې چې څو موټر هم پهکې سوځېدلي دي.
د راپورونو له مخې، د ایران سپاه پاسداران ویلي چې پر اسرائیلو یې یوولسم ځل بریدونه کړي، د هغوی د “فتاح” په نوم توغندي د اسرائیل له دفاعي سپره تېر شوي او د اسرائیلي ځواکونو پټنځایونه یې په نښه کړي دي.
دا په داسې حال کې ده چې د امریکا ولسمشر ډونالډ ټرمپ پر خپله اېکسپاڼه لیکلي: «موږ پوهېږو چې په اصطلاح ستر مشر چېرې پټ دی، دی یو اسان هدف دی، خو همالته خوندي دی، موږ یې نه راوباسو لږ تر لږه د اوس لپاره نه.»
هغه لیکلي: «خو موږ پر ملکي خلکو او امریکايي پوځیانو د توغندیو ګوزارونه نه غواړو، زموږ د زغم جامه نرۍ ده.»
خو د ایران ولسمشر مسعود پزشکیان پر ایران د اسرائیلو بریدونو ته په اشاره ویلي چې دغه بریدونه د امریکا له ملګرتیا پرته ناشوني دي. هغه ویلي چې که امریکا اسرائیل مهار نه کړي نو سخت ځوابونه به ورکړي.
د راپورونو له مخې، د امریکا د کانګرېس غړي د هغې مسودې په اړه بحث کوي چې له ایران سره په مخامخ جګړه کې د ښکېلتیا په تړاو د ټرمپ وړتیا محدودوي.
د جګړې واکونو پرېکړهلیک په نوم یاده مسوده کې راغلي، ټرمپ نه شي کولای بې تاییده پر ایران ګوزارونه وکړي چې لومړی یې د کانګرېس تایید نه وي ترلاسه کړی.
د امریکا مشرانو جرګه کې د دې مسودې په اړه د بحث په لړ کې د ویرجینیا ډیموکرات سناتور ټیم کایني وویل، که امریکا د ایران پر ضد جګړه وکړي، دا به له ۲۰۰۱ کال راهیسې درېیمه جګړه وي چې امریکا یې په منځني ختیځ کې کوي.
د ده په وینا، له ایران سره داسې یوه جګړه به د امریکا لپاره یوه ناوریني تېروتنه وي او په منځني ختیځ کې به پر امریکايي اډو د پراخو بریدونو لامل شي.
Views: 6
