د راپورونو له مخې، اسراییل د امریکا له لوري غزه کې د اوربند چمتو شوې طرحه منلې ده خو حماس ویلي له داسې طرحې سره به موافقه ونه کړي چې په دایمي توګه د جګړې د بندېدو لامل نه ګرځي.
رویټرز نن په یوه راپور کې ویلي چې اسراییل په غزه کې د اوربند لپاره د امریکا طرحه مخکې له دې چې حماس ته واستول شي، لاسلیک کړې ده.
سرچینې زیاته کړې، په دغه طرحه کې غزه کې د ۶۰ ورځنۍ اوربند او د بشري مرستو لېږد شامل دي.
د سرچینې د معلوماتو له مخې، حماس دا مهال پر دغه طرحه غور کوي.
بلخوا نن د بيبيسي په یوه راپور کې راغلي، د حماس یوه چارواکي ویلي چې د ټرمپ د ځانګړي استازي سټیو ویټکاف له هغه وړاندیز سره به موافقه و نه کړي چې د ۶۰ ورځو اوربند په بدل کې د لسو ژوندي اسرائیلي بندیانو خوشي کولو ته اشاره کوي؛ ځکه چې په دې توافق سره جګړه په دایمي توګه نه درېږي.
په راپور کې راغلي، د حماس د سیاسي دفتر غړي باسم نعیم رسنیو ته په خپلو څرګندونو کې تایید کړه چې په غزه کې د اوربند لپاره د امریکا وړاندیز «زموږ د خلکو هېڅ غوښتنې ته ځواب نه وايي.»
دا په داسې حال کې ده چې د روان ۲۰۲۵ کال په جنوري میاشت کې د امریکا، مصر او قطر په منځګړیتوب د اسرائيل او حماس ترمنځ د اوربند او بندیانو د تبادلې لنډمهالی تړون شوی و.
Views: 9
