د راپورونو له مخې، په پاکستان او هند کې د ځینو هوایي ډګرونو فعالیتونه درېدلي، د پاکستان او شمالي هند پر هوایي حریمونو الوتنې نه کېږي او پاکستان ویلي چې تېره شپه یې د هند ۱۲ بېپیلوټه الوتکې غورځولې دي.
د روانې غويي مياشتې په دویمه د هند تر ولکې لاندې کشمیر کې وسلهوالو د ګرځندویانو په یوه مشهور ځای «پهلګام» کې پر سیلانیانو بريد وکړ چې لږ تر لږه ۲۶ کسان پهکې ووژل او ۱۷ نور ټپیان شول.
هند دغه برید په پاکستان پورې تړلی بولي، خو اسلاماباد هر ډول لاس لرل پهکې ردوي.
د چهارشنبې په شپه هندي رسنیو راپور ورکړ چې د دغه هېواد هوايي ځواک د پاکستان پر ځینو سیمو برید کړی، خو په دغو بریدونو کې ملکي وګړي او پوځي تاسیسات نه دي په نښه شوي.
خو د پاکستان چارواکو ویلي چې د هند په بریدونو کې ۲۶ کسان وژل شوي او ۴۶ نور ټپیان دي او د هند شپږ الوتکې یې له منځه وړې دي.
د ډان ورځپاڼې د راپور له مخې، د پاکستان د پوځ ویاند جنرال احمدشریف چودري نن ویلي چې د هند ۱۲ بېپیلوټه الوتکې (ډرونونه) تېره شپه د پاکستان په بېلابېلو سیمو کې غورځول شوې دي.
هغه ویلي چې دا الوتکې لاهور، اټک، ګوجرانواله، چکوال، راولپنډۍ، بهاولپور، میانو، چهور او د کراچۍ ترڅنګ را نسکورې شوې دي.
ځینې هندي رسنیو بیا د دغه هېواد د بهرنیو چارو وزارت په حواله راپور ورکړی چې د پاکستان له لوري د کنټرول کرښې (LoC) په اوږدو کې د متقابلو بریدونو په ترڅ کې ۱۳ ملکي وګړي وژل شوي او ۵۹ نور ټپیان شوي دي.
د هوایي ډګرونو تړل کېدل
بلخوا، د ځینو رسنیو او هوايي شرکتونو له خوا د خپرو شوو سفري لارښوونو له مخې، په هند کې څه باندې شل هوايي ډګرونه به – چې ډېر یې د دغه هېواد په شمال کې دي – د مې میاشتې تر ۱۰مې پورې تړل شوي وي.
دغه راپورونه د هند د ملکي هوايي چلند وزارت له خوا چې د هوايي ډګرونو د تنظیم مسوولیت لري، تر اوسه نه دي تایید شوي.
په هند کې لویو هوايي شرکتونو تېره ورځ له هغه وروسته چې د هند له خوا پاکستان او د دغه هېواد تر ادارې لاندې کشمیر کې هوایي بریدونو وشول، د هغو مسافرو لپاره لارښوونې خپرې کړې چې د هوايي ډګرونو د تړلو له امله اغېزمن شوي دي.
راپورونه ښیي چې تېره ورځ په هند کې له ۴۰۰ ډېرې الوتنې لغوه شوې او له یو شمېر هوايي ډګرونو مسافر بېرته ګرځول کېدل.
د پاکستان او د شمالي هند پر هوایي حریم لا هم الوتکې الوتنه نه کوي.
د الوتکو څارلو نړۍوال ویبسایټونه ښیي چې نړۍوالو الوتکو نن (پنجشنبه) هم د یادو هوایي مسیرونو پر ځای د عمان، متحده عربي اماراتو او کويټ له هوایي حریمونو په ګټنې اخیستو الوتنې کوي.
دوی خبرداری ورکړی چې ښایي پر نوو هوایي مسیرونو د الوتکو ګڼهګوڼه ډېره شي.
پاکستاني چارواکو ویلي چې هلته د کراچۍ، لاهور او سیالکوټ هوایي ډګرونو فعالیتونه ځنډېلي دي.
Views: 6
